İran Silahlı Qüvvələri ABŞ-ın Hörmüz boğazının idarə olunmasına müdaxilə etməsinə icazə verməyəcəklərini bəyan edib. Bu açıqlama ABŞ Prezidenti Donald Trampın Vaşinqtonun strateji əhəmiyyət daşıyan boğaza nəzarət edə biləcəyi ilə bağlı səsləndirdiyi fikirlərdən sonra verilib.
İran Silahlı Qüvvələrinin Birləşmiş Komandanlığının nümayəndəsi bildirib ki, Tehran bu məsələ ilə bağlı mövqeyini daha əvvəl də açıqlayıb və onu dəyişmək niyyətində deyil.
“Əvvəlki xəbərdarlıqlarımıza baxmayaraq, ABŞ-ın Hörmüz boğazının idarə olunmasına müdaxilə etməsinə imkan verməyəcəyik”, – deyə o vurğulayıb.
Tehran sərt cavab veriləcəyini bildirir
İran rəsmisinin sözlərinə görə, kommersiya gəmiləri və neft tankerlərinin müəyyən edilmiş marşrutlardan kənarda və İran hakimiyyətinin icazəsi olmadan hərəkəti təhlükəsizlik baxımından qəbuledilməz hesab olunacaq.
O əlavə edib ki, Silahlı Qüvvələr belə halları təhlükə kimi qiymətləndirəcək və zərurət yaranacağı təqdirdə qətiyyətli tədbirlər görəcək. Həmçinin ABŞ-la hər hansı əməkdaşlıq və ya ona logistika dəstəyi göstərilməsi İranın suverenliyi və milli təhlükəsizliyinə qarşı addım kimi dəyərləndiriləcək.
Son günlər Hörmüz boğazı ətrafında ABŞ və İran arasında gərginlik daha da artıb. Donald Tramp ABŞ-ın bu strateji dəniz yoluna nəzarəti öz üzərinə götürə biləcəyini bildirib, İran isə buna cavab olaraq xarici müdaxiləyə imkan verməyəcəyini və boğazın idarə olunması məsələsində mövqeyindən geri çəkilməyəcəyini bəyan edib.
