Zimbabvedə 8 yaşlı uşaq Matuzadona Milli Parkında itkin düşərək 5 gün boyunca vəhşi heyvanların arasında sağ qalmağı bacarıb.
Daylinews-Az xəbər verir ki, bu barədə Daily Mail məlumat yayıb. Xəbərə əsasən, uşaq kənd bölgəsində yaşayarkən istiqamətini itirib və təsadüfən milli parkın ərazisinə daxil olub.
Məsələ ilə bağlı məlumatı Zimbabve parlamentinin üzvü Mutsa Murombezi açıqlayıb. O, hadisənin Qərbi Maşonalend vilayətində baş verdiyini bildirib.
Uşağın sağ qalması
Murombezi qeyd edib ki, itkin düşmüş uşağı yerli əhalinin təşkil etdiyi axtarış qrupu yalnız 5 gün sonra tapa bilib. Bu müddət ərzində uşaq vəhşi meyvələrlə qidalanıb və quruyan çayın yatağı yaxınlığında qazdığı çaladan su içib.
“Evindən 23 km uzaqda vəhşi heyvanların – aslanların nəriltisi və fillərin keçidi arasında bir qayalıqda yatmaq, vəhşi meyvələrlə dolanmaq və sərt təbiətin öhdəsindən gəlmək 8 yaşlı uşaq üçün inanılmaz bir sınaqdır,” – deyə deputat sosial şəbəkədə yazıb.
Matuzadona Milli Parkı haqqında
Matuzadona Milli Parkı Afrikanın ən böyük aslan populyasiyalarından birinə ev sahibliyi edir – təxminən 40 baş aslan bu ərazidə yaşayır. Bundan əlavə, parkda fillər, begemotlar, camışlar və digər təhlükəli heyvanlar da mövcuddur.
