Amerikalı aktyor, “Tikanlı Qızılgüllər Arasında Mahnılar” filminin və “Doktor Kilder”, “Şoqun” kimi məşhur serialların ulduzu Riçard Çemberlen dünyasını dəyişib. O, 29 mart tarixində, uzun illər yaşadığı Havay adalarında vəfat edib. Bu barədə Variety nəşrinə aktyorun publisisti Harlan Boll məlumat verib.
Onun ölüm səbəbi insultdan sonra yaranan ağırlaşmalar olub. Çemberlenin 91 yaşı martın 31-də tamam olacaqdı.
Aktyorun sənət karyerası 1960-cı illərdə başlayıb və o, 80-dən çox film və televiziya layihəsində iştirak edib. Riçard Çemberlen üç dəfə “Qızıl Qlobus” mükafatına layiq görülüb və klassik rolları ilə tanınıb. Onun oynadığı filmlər arasında “Musiqi Aşiqləri” (1971), “Üç Muşketyor” (1973), “Kral Süleymanın Xəzinələri” (1985) və “Tikanlı Qızılgüllər Arasında Mahnılar” (1983) xüsusi yer tutur.
