“Qarabağ” klubunun prezidenti Tahir Gözel UEFA Avropa Liqasının Liqa mərhələsinin başlanğıcı öncəsi komandanın rəsmi saytına açıqlama verib. O, “Tottenham”la qarşıdakı matçın əhəmiyyətindən danışıb və London görüşü ilə bağlı fikirlərini bölüşüb.
Gözel bildirib ki, “Qarabağ” artıq ardıcıl 11-ci dəfədir ki, avrokubokların əsas mərhələsində mübarizəyə qoşulur. İlk oyun İngiltərədə, futbolun doğma torpağında keçiriləcək. O, “Tottenham”ın yalnız Avropa Liqasında deyil, ümumiyyətlə, Avropanın güclü komandalarından biri olduğunu qeyd edib. Buna baxmayaraq, Gözel komandasına tam inamını ifadə edib: “Hər bir futbolçumuza inanıram, onlar həmişə güclü rəqiblərlə oyunlarda əsl qəhrəman kimi mübarizə aparıblar.”
Prezident həmçinin Avropa kuboklarında bu ildən etibarən yeni formatın tətbiq olunmasına da toxunub. Yeni formatda qrup mərhələsi əvəzinə Liqa mərhələsi tətbiq olunur və bu, 36 klubun mübarizə aparacağı daha geniş bir turnir formatı deməkdir. Bu yenilik, Gözelin fikrincə, azarkeşlərə daha çox həyəcan və maraq gətirəcək. O qeyd edib ki, “Qarabağ” bu mərhələdə ən yüksək nəticələri hədəfləyir və azarkeşlərini yenə sevindirməyi planlaşdırır.
Gözel həmçinin komandanın həm Premyer Liqa, həm də Azərbaycan kubokundakı titullarını qorumaq üçün mübarizə aparacağını vurğulayıb. O, komandanın heyətinə yeni transferlərin qoşulduğunu və azarkeşlərin daha güclü “Qarabağ” görəcəyinə inandığını bildirib.
Prezident “Tottenham”la görüşü stadiondan izləyəcəyini və komandasının yanında olacağını qeyd edib: “Bu vacib matçda komandamın yanında olacağam, Londondakı qarşılaşmanı stadiondan izləyəcəyəm. Biz bir komandayıq və səfərdə də Azərbaycan xalqını qürurlandırmaq üçün əlimizdən gələni edəcəyik.”
