2025-ci ildə Günəş aktivliyinin artması ilə əlaqədar olaraq Yer kürəsində təxminən 50 maqnit qasırğasının baş verəcəyi gözlənilir. Bu barədə Dövlət Maarif Universitetinin Nəzəri və Tətbiqi Nanotexnologiyalar Laboratoriyasının mühəndisi, fizik Roman Kuçerov açıqlama verib.
İlin ən aktiv dövrlərindən biri olacaq
Mütəxəssisin sözlərinə görə, adətən il ərzində 30-35 orta güclü maqnit qasırğası baş verir. Lakin Günəşin yüksək aktivlik göstərdiyi illərdə bu rəqəm 50-yə qədər arta bilər: “2025-ci il yüksək aktivlik dövrünə təsadüf edir. Bu da o deməkdir ki, ilin sonunadək müxtəlif intensivlikdə çoxsaylı maqnit qasırğaları olacaq. Onların bəziləri isə son dərəcə güclü ola bilər“, – deyə Kuçerov bildirib.
Texnikaya və əhval-ruhiyyəyə təsiri ola bilər
Fizikin sözlərinə görə, güclü maqnit qasırğaları:
- Rabitə və elektrik avadanlıqlarına təsir edir
- Yerətrafı orbitlərdə peyklərin fəaliyyətinə maneə yaradır
- İnsanlarda yuxusuzluq, baş ağrısı və yorğunluq yarada bilər
- Şimal işıqlarının tropik bölgələrdə belə görünməsinə səbəb ola bilər
Tarixdəki ən güclü maqnit qasırğası
Kuçerov 1859-cu ildə baş vermiş və “Kerrinqton hadisəsi” adlandırılan qasırğanı xatırladıb. Həmin zaman teleqraf sistemləri sıradan çıxmış, hətta tropik bölgələrdə də auroralar müşahidə olunmuşdu.
Maqnit qasırğaları necə yaranır?
Maqnit qasırğaları Günəşdə baş verən plazma partlayışlarının nəticəsində yaranır. Bu zaman kosmosa atılan yük daşıyan hissəciklər Yerə çatanadək maqnitosferlə toqquşaraq onun strukturunu pozur və qasırğaya səbəb olur. Fizik vurğulayıb: “Maqnit qasırğaları bir neçə saatdan bir neçə günədək davam edə bilər. Bu hadisələr təkcə son yüzilliklərdə deyil, minlərlə il əvvəl də müşahidə olunub və Günəş mövcud olduqca baş verməyə davam edəcək.”
