Bakının küçə və prospektlərində fəaliyyət göstərən bir sıra fərdi parkinq nöqtələri birləşdirilərək vahid zonalar şəklində təşkil olunub. Bu barədə Azərbaycan Yerüstü Nəqliyyat Agentliyi (AYNA) məlumat yayıb.
AYNA-nın açıqlamasına görə, bu addım ödənişli parkinq yerlərinin istifadəsini asanlaşdırmaq və sürücülərə daha rahat xidmət göstərmək məqsədilə atılıb.
Yeni sistem necə işləyəcək?
- Bir küçə üzərində yerləşən bir neçə parkinq nöqtəsi vahid kodla təqdim olunacaq
- Müvafiq yolayrıcısı çərçivəsində yerləşən bütün parkinq hissələri bir nömrə altında birləşdiriləcək
Bu yanaşma sürücülərin park yeri nömrələrini daha rahat tapmasına, ödəmələri tez və düzgün etməsinə imkan verəcək.
Rəqəmlər necə dəyişdi?
Əvvəllər Bakıda 2 400-ə yaxın fərdi parkinq nöqtəsi var idi. Yeni sistem sayəsində bu göstərici 690 vahid nöqtəyə endirilib. Bu isə şəhərdə parkinq idarəçiliyinin optimallaşdırılması baxımından mühüm irəliləyiş hesab olunur.
