Azərbaycan Səhiyyə Nazirliyi 2023–2027-ci illəri əhatə edən uşaq infeksion xəstəliklərinə qarşı immunoprofilaktika proqramı çərçivəsində 6-valentli “Hexaxim” (Hexa vaccine) peyvəndinin alınması üçün hazırlıqlara başlayıb.
Daylinews-az.com-un məlumatına görə, bu məqsədlə Nazirliyin tabeliyindəki Səhiyyənin Təminatı Mərkəzi tərəfindən 310 min doza innovativ kombinə olunmuş vaksin sifariş ediləcək. Satınalmanın ümumi dəyəri 25,2 milyon manat təşkil edəcək.
Hexaxim peyvəndi nədir?
Hexaxim – uşaqları bir iynə ilə altı müxtəlif təhlükəli infeksiyadan qoruyan çoxkomponentli peyvənddir. O, aşağıdakı xəstəliklərə qarşı immunitet yaradır:
- Difteri
- Köküyə (kəskin öskürək)
- Tetanus (çənə tutulması)
- Hepatit B
- Uşaqlıq iflici (poliomielit)
- Hemofil infeksiya (Hib)
Bu peyvənd 2, 4 və 6 aylıq körpələrə vurulur, 18 ayda isə revaksinasiya aparılır.
Uşaqlar üçün daha güclü və rahat müdafiə
Tibbi ekspertlər bildirirlər ki, bu peyvənd həm təhlükəsiz, həm də effektivdir. O, bir neçə ayrı-ayrı iynə yerinə tək dozada tətbiq olunmaqla, uşaqların həm fiziki narahatlığını, həm də valideynlərin və tibb işçilərinin yükünü azaldır.
Yeni peyvəndin tətbiqi ilə ölkədə infeksion xəstəliklərə qarşı məhsuldar və davamlı mübarizə hədəflənir. Bu da körpələrin sağlam böyüməsinə, uzunmüddətli immunitetə və ümumi səhiyyə göstəricilərinin yaxşılaşmasına şərait yaradacaq.
