Hollivud ulduzları Ancelina Coli və Bred Pittin 19 yaşlı bioloji qızı Şaylo Coli-Pitt özünü yeni adla – Şi Coli kimi təqdim edib. Bu hadisə Los-Ancelesdə məşhur Isabel Marant moda evinin qapalı təqdimat mərasimində baş verib. Gənc istedad tədbirdə xoreoqraf kimi çıxış edərək tanınmış rəqqaslar üçün səhnə nömrəsi hazırlayıb.
İlk çıxışı və yeni imici
Daylinews-az.com yazır ki, “Oliver House”da baş tutan “gün batımında nahar” adlı tədbirin rəsmi materiallarında Şi Coli adı qeyd olunub. O, Keoni Rouz və Tako Suzuki üçün xoreoqrafiyanı özü hazırlayıb. Performans canlı ifa zamanı Luella tərəfindən səsləndirilən Naïve mahnısı ilə müşayiət olunub.
Ailədən və keçmişdən uzaqlaşma
Gənc rəqqasənin bu addımı onun şəxsiyyətinin formalaşmasında daha bir mərhələdir. 2024-cü ilin mayında yetkinlik yaşına çatdıqdan sonra o, məhkəmə yolu ilə atasının soyadından imtina etmiş və “Coli” soyadını saxlamışdı. İndi isə Şi adını seçərək öz sənətkar kimliyini tam formalaşdırmağa çalışır.
Şaylo doğulduğu gündən medianın diqqət mərkəzində olub. 2006-cı ildə Namibiyada dünyaya gələn qızcığaz hələ 2014-cü ildən “Con” adlandırılmaq istədiyini bildirmiş, 2018-ci ildə isə hormon terapiyasına başladığı haqda məlumat yayılmışdı. Lakin daha sonra qərarını dəyişmiş və ictimaiyyət qarşısına daha qadına xas obrazlarda çıxmağa başlamışdı.
Şöhrətdən uzaq, sənətə doğru
Uşaqlıqdan tanınmış valideynlərə sahib olan Şaylo, onların yolunu davam etdirməyib. Aktyorluq əvəzinə rəqs sənətini seçib və bu istiqamətdə peşəkar fəaliyyətə başlayıb. Isabel Marant nümayişindəki çıxışı onun bu sahədə ciddi olduğunu göstərdi.
Ailə münasibətləri və Pitt soyadından imtina
Coli-Pitt ailəsində münasibətlər uzun müddətdir gərgindir. 2016-cı ildə baş verən boşanma və onun ardınca Ancelina Colinin Bred Pitti ailə zorakılığında ittiham etməsi ailə üzvləri arasında uçurumu daha da dərinləşdirib.
People jurnalına danışan mənbələrə görə, Bred Pitt qızının qərarından xəbərdar olub və bu hal onu çox kədərləndirib:
“O, uşaqlarını sevir və onlara darıxır. Bu, çox kədərlidir.”
Şaylo Pitt soyadından imtina edən ilk uşaq deyil. Qardaşı Maddoks (23), bacıları Zahara (20) və Vivyen (16) də eyni addımı atıblar.
Yeni ad – yeni başlanğıc
Qərb mediası Şi Coli adının onun rəqs və xoreoqrafiya sahəsində rəsmi yaradıcılıq adı kimi istifadə ediləcəyini istisna etmir. Bu, həm də onun valideynlərinin kölgəsindən çıxaraq öz şəxsiyyətini formalaşdırmaq istədiyinin göstəricisi hesab olunur.
Isabel Marant tədbirində Milla Yovoviç, Elison Bri, January Jones və Reyçel Bilson kimi məşhurlar da iştirak edib. Bu da tədbirin nüfuzunu və Şi Colinin yeni adı ilə debütünün əhəmiyyətini bir daha vurğulayıb.
