ABŞ-ın Los-Anceles şəhərində miqrasiya reydlərinə qarşı keçirilən etiraz aksiyalarının fonunda şəhər meri Karen Bass komendant saatı tətbiq edib. Bu barədə o, sosial şəbəkə X-də açıqlama verib:
“Prezidentin yaratdığı xaotik vəziyyətdən faydalanmağa çalışan təxribatçıların qarşısını almaq üçün komendant saatı elan etdim”, – deyə Bass bildirib.
Saat məhdudiyyəti və əhatə dairəsi
Komendant saatı 10 iyun axşam saat 20:00-dan səhər saat 06:00-dək (yerli vaxtla) qüvvədə olacaq. Bu qərar, CNN-in hüquq-mühafizə orqanlarındakı mənbələrinə görə, 4 milyon əhalisi olan Los-Ancelesdə təxminən 100 min nəfəri əhatə edir.
Şəhərin polis idarəsi X-də yayımladığı bəyanatda xəbərdarlıq edib:
“İllegal yığıncaqlarda və ya cinayət fəaliyyətlərində iştirak edən istənilən şəxs saxlanılacaq və həbs olunacaq.”
Artıq onlarla etirazçı saxlanılıb
CNN jurnalistlərinin məlumatına əsasən, komendant saatının tətbiq edildiyi zonada 10-20 nəfər arasında etirazçı artıq saxlanılıb. Bir nəfərin yerə yıxılaraq əllərinin arxadan bağlandığı da qeyd olunub.
Hadisə yerindən reportaj verən jurnalist bildirib ki, əksər etirazçılar artıq ərazini tərk edib və polis küçələri yavaş-yavaş təmizləyir.
Los-Anceles Polis Departamenti daha sonra bildirib ki, etirazçı qrupların bir neçəsi 1-ci küçədə – Spring ilə Alameda küçələri arasında toplaşmağa davam edir və həmin qruplara qarşı tədbirlər görülür, kütləvi həbslər başlanıb.
Gərginliyin səbəbi: Miqrasiya reydləri və Trampın mövqeyi
Qeyd edək ki, 6 iyun axşamından etibarən şəhərdə, əsasən latin əsilli əhalinin yaşadığı rayonlarda, Tramp administrasiyasının təşəbbüsü ilə həyata keçirilən miqrasiya reydləri nəticəsində ICE agentləri ilə yerli sakinlər arasında toqquşmalar baş verib.
10 iyun tarixində isə Donald Tramp etirazçılara qarşı əgər Milli Qvardiyaya hörmətsizlik göstərilərsə, sərt cavab veriləcəyini bəyan edib.
