Prezident yanında Antiinhisar və İstehlak Bazarına Nəzarət Dövlət Agentliyi “Atena” MMC-nin fəaliyyətində rəqabət qanunvericiliyinin pozulması ilə bağlı araşdırma aparır.
Daylinews-az.com-un agentliyə istinadən verdiyi məlumata görə, yoxlamalar süd və süd məhsullarının istehsalı və satışında haqsız rəqabət hallarının mövcudluğu ilə bağlı faktları əhatə edir.
“Atena” MMC 2011-ci ildən fəaliyyət göstərir və Azərbaycanda süd və süd məhsulları bazarında tanınmış brendlərdən biridir. Lakin son vaxtlar “İvanovka Süd Məhsulları” şirkəti tərəfindən “Atena”ya qarşı haqsız rəqabətə dair şikayətlər daxil olub və bu səbəbdən də Agentlik tərəfindən müvafiq araşdırmalar həyata keçirilir.
Araşdırmanın əsas məqsədi bazarda rəqabətin qorunması, istehlakçıların hüquqlarının müdafiəsi və qanun pozuntularının qarşısının alınmasıdır. Süd məhsulları bazarında “Atena”nın mövqeyi güclü olsa da, bu cür halların aşkarlanması sektorda şəffaflığın artırılması üçün vacibdir.
