Avstraliyalı məşhur aktyor Julian McMahon – “Charmed”, “Nip/Tuck” və “FBI: Most Wanted” kimi kult serialların ulduzu – 2 iyulda 57 yaşında dünyasını dəyişib. Ulduzun ölüm səbəbi uzun müddət davam edən xərçəng xəstəliyi olub.
McMahon-un vəfatı barədə xəbəri onun həyat yoldaşı Kelli McMahon “Deadline” nəşrinə təsdiqləyib:
“Açıq ürəklə bütün dünyaya bildirmək istəyirəm: sevimli ərim Julian McMahon bu həftə uzun və cəsur mübarizədən sonra sülh içində dünyasını dəyişdi“, – deyə Kelli bildirib.
Onun sözlərinə görə, aktyor son ana qədər həyatsevər, ailəsini, dostlarını, işini və pərəstişkarlarını sevən insan kimi qalıb:
“Julian-ın ən böyük arzusu başqalarına sevinc bəxş etmək idi. Bizdən xahiş edirik ki, onunla sakit şəkildə vidalaşmaq üçün bizə zaman və məkan verəsiniz. Kimə ki Julian işıq bəxş etmişdisə, o işığı yaşatmağa davam etsin.”
Julian McMahon üç dəfə ailə həyatı qurub. O, ilk dəfə avstraliyalı müğənni Dannii Minogue ilə evli olub. İkinci evliliyində amerikalı aktrisa Brook Burns-dən Madison adlı bir qızı dünyaya gəlib. 2014-cü ildən etibarən isə Kelli Panagua ilə ailəli idi və ölümünə qədər bir yerdə yaşayıblar.
Julian McMahon-un adı bir çox tamaşaçılara “Charmed” serialındakı Cole Turner – cazibədar iblis və Phoebe Halliwell-in sevimlisi – obrazı ilə tanışdır. Bu rol aktyora böyük fan bazası qazandırdı.
Bundan başqa, McMahon-un ən çox tanınan obrazlarından biri də “Nip/Tuck” serialındakı estetik cərrah Christian Troy olub. Rol həm aktyora beynəlxalq şöhrət gətirdi, həm də televiziya tarixində ikonik xarakterlərdən birinə çevrildi.
McMahon həmçinin “Fantastic Four” filmində Dr. Doom, “FBI: Most Wanted” serialında isə agent Jesse LaCroix kimi çıxış edib. Onun son işi isə Netflix platformasında yayımlanan “The Residence” adlı siyasi triller idi – burada o, Avstraliyanın Baş naziri rolunda çəkilmişdi.
