Oktyabrın 1-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) hazırlıq məqsədilə Təşkilat Komitəsinin yeddinci iclası keçirilib.
“Daylinews-az” xəbər verir ki, iclasda Prezident Administrasiyasının rəhbəri və Təşkilat Komitəsinin sədri Samir Nuriyev çıxış edərək Prezident İlham Əliyevin tapşırıqları əsasında COP29 üzrə Tədbirlər Planının həyata keçirilməsində son dövrdə görülən işlərdən bəhs edib. Nuriyev, dövlət başçısının COP29-a hazırlıq prosesinə xüsusi diqqət yetirdiyini və sentyabrın 10-da Bakı Olimpiya Stadionunda görülən işlərlə yerindəcə tanış olduğunu vurğulayıb. Həmin vaxt Prezident tərəfindən müvafiq tapşırıqlar və göstərişlər verilib.
Samir Nuriyev həmçinin qeyd edib ki, sentyabrın 22-23-də Nyu-Yorkda keçirilən “Gələcəyin Sammiti”ndə və BMT Baş Assambleyasının 79-cu sessiyasının ümumi müzakirələrində bir sıra dövlət və hökumət başçılarının çıxışlarında COP29-a xüsusi diqqət göstərilib. Noyabr ayında bütün dünyanın diqqətinin Azərbaycana yönələcəyini bildirən Nuriyev, bu çərçivədə Bakı İqlim Həftəsi kimi mühüm tədbirlərin təşkil olunduğunu vurğulayıb. O, xüsusilə İtki və Zərər Fondunun 3-cü iclasının əhəmiyyətini qeyd edib və Bakı İqlim Həftəsinin əldə etdiyi nəticələrin davamlı olacağına inandığını bildirib. Bununla yanaşı, o, oktyabrın 10-11-də keçiriləcək Pre-COP tədbirinin vacibliyini vurğulayıb.
Nuriyev çıxışında Prezident İlham Əliyevin kiçik ada dövlətlərinin COP29-da iştirakına dair verdiyi tapşırıqların beynəlxalq ictimaiyyət tərəfindən müsbət qarşılandığını qeyd edib. O, həmçinin, dövlət qurumlarının COP29 çərçivəsində beynəlxalq tərəfdaşlarla birgə çoxsaylı tədbirlər keçirəcəyini bildirib.
Samir Nuriyev, Azərbaycan qeyri-hökumət təşkilatlarının “Gələcəyin Sammiti”ndə fəal iştirak etdiklərini və bu tədbir nəticəsində 22 ölkədən 44 QHT nümayəndəsinin COP29-a ev sahibliyi edən ölkə kimi Azərbaycanın inklüzivliyə verdiyi dəstəyə dair bəyanat yaydıqlarını bildirib.
Təşkilat Komitəsinin iclasında iştirak edən digər rəsmi şəxslər də öz çıxışlarında COP29-a hazırlıq prosesində görülən işlər haqqında məlumat veriblər. Ekologiya və təbii sərvətlər naziri Muxtar Babayev Nyu-York İqlim Həftəsi çərçivəsində keçirilən görüşlər də daxil olmaqla COP29-la bağlı ümumi vəziyyət barədə danışıb. Prezidentin köməkçisi Anar Ələkbərov Bakı Olimpiya Stadionunda aparılan işlər və digər təşkilati-logistika məsələlərini vurğulayıb. Xarici işlər naziri Ceyhun Bayramov BMT Baş Assambleyasının 79-cu sessiyası çərçivəsində COP29-a dair müzakirələrdən bəhs edib.
Maliyyə naziri Samir Şərifov iqlim maliyyəsi və bu kontekstdə Beynəlxalq Valyuta Fondu və Dünya Bankı ilə əməkdaşlıq məsələləri barədə məlumat verib. Elm və təhsil naziri Emin Əmrullayev isə COP29 zamanı təhsil müəssisələrinin fəaliyyətinin təşkilindən danışıb. Dövlət Təhlükəsizliyi Xidmətinin rəisi Əli Nağıyev COP29 zamanı təhlükəsizlik tədbirləri haqqında çıxış edib. Mədəniyyət nazirinin müavini Səadət Yusifova “İqlim naminə mədəniyyət” təşəbbüsü çərçivəsində görülən işləri qeyd edib. Kənd təsərrüfatı nazirinin müavini İlhamə Qədimova isə COP29-la əlaqədar Kənd Təsərrüfatı Nazirliyinin həyata keçirdiyi “Harmoniya” təşəbbüsündən danışıb.
İclasın sonunda Samir Nuriyev COP29 üzrə Tədbirlər Planının davamlı şəkildə həyata keçirilməsi və digər aidiyyəti məsələlərlə bağlı yeni tapşırıqlar verib.
