ABŞ-da Turning Point USA təşkilatının qurucusu və Donald Trampın yaxın silahdaşı Çarli Kirkin qətli ilə bağlı yeni detallar ortaya çıxıb.
ABC News-un məlumatına görə, Federal Təhqiqat Bürosu (FTB) hadisə ilə bağlı şübhəlinin fotolarını ictimaiyyətə təqdim edib. Şəkillərdə gün eynəyi və beysbol papağı taxmış gənc bir kişi görünür.
FTB həmçinin hadisə yerinə yaxın meşəlik ərazidə qatilin istifadə etdiyi silahın tapıldığını açıqlayıb. Söhbət bolt mexanizmi ilə işləyən güclü tüfəngdən gedir. Hüquq-mühafizə orqanlarının məlumatına görə, bu, köhnə “Mauser” markalı idxal tüfəngidir.
İlkin araşdırmaya əsasən, güllə gilizi hələ də patron yuvasında idi, üç patron üzərində isə “transgender və anti-faşist yazıları” aşkar edilib. Silah və sursat DNT və barmaq izi analizləri üçün götürülüb.
Araşdırma çərçivəsində hüquq-mühafizəçilər şübhəlinin hərəkət marşrutunu müəyyən ediblər və keyfiyyətli video qeydlərə sahib olduqlarını bildiriblər.
Hadisə necə baş verdi?
- 10 sentyabrda, saat 11:52-də şübhəli Yuta Universitetinin kampusuna daxil olub.
- Təxminən saat 12:20-də Çarli Kirki açıq havada keçirilən tədbirdə atəşlə vurub.
- Kirk xəstəxanaya çatdırılsa da, həkimlər onun həyatını xilas edə bilməyib.
- Qətli törədən şəxs binanın damından digər tərəfə keçərək qaçıb.
Polis qonşu ərazilərdə dindirilmələr aparır, sakinlərin qapı zəngi kameralarındakı görüntüləri yoxlayır və şahidlərin ifadələrini toplayır. Hadisə yerindən ayaqqabı, əl və qol izləri də götürülüb.
FTB ictimaiyyətə müraciət edərək şübhəli barədə məlumatı olan hər kəsi foto və videolarla birlikdə hüquq-mühafizə orqanlarına müraciət etməyə çağırıb.
Donald Tramp sentyabrın 10-da Çarli Kirkin ölümünü təsdiqləyərək onu “böyük və hətta əfsanəvi” şəxs adlandırıb.
