ABŞ-ın paytaxtı Vaşinqtonda Katolik Kilsəsinin tanınmış ekzorsistlərindən biri olan Stiven Rossetti qalmaqallı açıqlamalarından sonra vəzifəsindən kənarlaşdırılıb. 74 yaşlı keşiş UFO-larla bağlı müşahidələrin əhəmiyyətli hissəsinin əslində insanları aldatmağa çalışan şeytani qüvvələrin fəaliyyəti ola biləcəyini iddia edib. Bu barədə Britaniyanın Daily Star nəşri məlumat yayıb.
UFO-lar haqqında dedikləri qalmaqala səbəb oldu
Katolik keşişi, klinik psixoloq və uzun illər ekzorsizm fəaliyyəti ilə məşğul olan Rossetti mayın 29-da yayımladığı videomüraciətdə Efeslilərə Məktubun 6:12 ayəsinə istinad edərək insanların mənəvi təhlükələrə qarşı ayıq olmasının vacibliyini vurğulayıb.
O, öz təcrübəsinə əsaslanaraq demonların və müxtəlif ruhani varlıqların fərqli formalarda görünə biləcəyini bildirib. Rossettinin sözlərinə görə, bəzi hallarda insanlar tərəfindən müşahidə edilən qəribə məxluqlar, sirli işıq kürələri və ya “kölgə insanlar” kimi təsvir olunan hadisələr bunun nümunəsi ola bilər.
“Bu, kilsənin rəsmi təlimi deyil, mənim şəxsi qənaətimdir. Hesab edirəm ki, UFO müşahidələrinin böyük hissəsi, bəlkə də əksəriyyəti demonik fəaliyyətlə bağlı ola bilər. Onlar insanların edə bilmədiyi hərəkətləri həyata keçirə və müəyyən təsirlər göstərə bilirlər”, – deyə keşiş bildirib.
Rossetti videoda həmçinin avtomatik yazı vasitəsilə vəfat etmiş nənəsi ilə əlaqə saxladığını düşünən bir qadının hekayəsini danışaraq bunun əslində aldadıcı ruhların təsiri ola biləcəyini qeyd edib.
Kilsənin reaksiyası gecikmədi
Qalmaqallı açıqlamalardan sonra Vaşinqton arxiyepiskopu kardinal Robert Makelroy məsələyə münasibət bildirib. Onun sözlərinə görə, Katolik Kilsəsi ekzorsizm və fövqəltəbii hadisələrə dair mövzulara hər zaman ehtiyatla yanaşıb və bu sahənin ictimai sensasiyaya çevrilməsini doğru hesab etmir.
Makelroy qeyd edib ki, Rossettinin bəyanatları və onun fəaliyyət göstərdiyi Müqəddəs Mixail Ruhani Yenilənmə Mərkəzinin sosial şəbəkələrdə paylaşdığı məzmun kilsənin şeytan, demonlar və ekzorsizm haqqında rəsmi mövqeyi ilə uyğun gəlmir.
Bundan sonra Rossetti 19 illik fəaliyyətinin ardından ekzorsist vəzifəsindən uzaqlaşdırılıb. Eyni zamanda arxiyepiskopluq mərkəzlə bütün rəsmi əməkdaşlığı dayandırıb.
Keşiş sonradan videonu silərək üzr istəyib və bildirib ki, gələcək fəaliyyətində Katolik Kilsəsinin qaydalarına tam riayət etməyə çalışacaq.
Maraqlıdır ki, UFO mövzusu son aylarda ABŞ-da yenidən gündəmə gəlib. Bu yaxınlarda ABŞ Milli Təhlükəsizlik Agentliyi Soyuq Müharibə dövrünə aid yüzlərlə səhifəlik sənədi açıqlayıb. Həmin materiallarda müxtəlif ölkələrin hərbi pilotlarının naməlum uçan obyektlərlə bağlı çoxsaylı müşahidələri yer alır. Bununla belə, bu hadisələrin mənşəyi barədə hələ də qəti elmi və ya rəsmi nəticə açıqlanmayıb.
