Abşeron Olimpiya İdman Kompleksində Azərbaycan Cüdo Federasiyasının təşkilatçılığı ilə kəmər dərəcələri üzrə rəsmi imtahan keçirilib. Tədbirdə müxtəlif yaş qruplarından olan cüdoçular iştirak edərək bilik və bacarıqlarını nümayiş etdiriblər.
İmtahanda ümumilikdə 425 idmançı iştirak edib. Onlar hazırlıq səviyyələrinə uyğun olaraq ağ-sarı, sarı, narıncı, yaşıl, göy və qəhvəyi kəmər dərəcələri üzrə texniki tapşırıqları yerinə yetiriblər.
Kəmər sistemi cüdoçuların inkişafına xidmət edir
İmtahan zamanı iştirakçılar müxtəlif texniki elementlər və döyüş üsulları üzrə bacarıqlarını nümayiş etdiriblər. Hakimlərin qiymətləndirməsindən sonra imtahanı uğurla keçən cüdoçulara müvafiq kəmərlər və sertifikatlar təqdim olunub.
Kəmər imtahanları cüdoçuların texnikanı daha sistemli şəkildə mənimsəməsinə və məşqlərə motivasiyasının artmasına kömək edir. Eyni zamanda kəmər dərəcəsi idmançının hazırlıq səviyyəsinin rəsmi göstəricisi hesab olunur və gələcəkdə müxtəlif yarışlarda iştirak üçün vacib şərtlərdən biridir.
