Amerikalı pop ulduz Britni Spirs Kaliforniyanın Ventura dairəsində sərxoş vəziyyətdə avtomobil idarə etməkdə şübhəli bilinərək polis tərəfindən saxlanılıb. Bu barədə TMZ hüquq-mühafizə orqanlarındakı mənbələrə istinadən məlumat yayıb.
Məlumata görə, hadisə martın 4-də axşam saatlarında baş verib. Bildirilir ki, müğənni yerli vaxtla təxminən saat 21:30 radələrində Kaliforniya Yol Polisi tərəfindən saxlanılıb. İlkin məlumatlara əsasən, o, sərxoş vəziyyətdə avtomobil idarə etməkdə şübhəli bilinib.
Pop ulduz qısa müddət sonra sərbəst buraxılıb. Hələlik rəsmi ittihamların irəli sürülüb-sürülmədiyi və ya məhkəmə tarixinin təyin edilib-edilmədiyi barədə məlumat açıqlanmayıb.
Müğənninin nümayəndələri hadisə ilə bağlı hələ rəsmi açıqlama verməyiblər. Xarici media məsələ ilə bağlı onun komandasının mövqeyini gözləyir.
Britni Spirs son illərdə tez-tez gündəmdədir
Britni Spirs son illərdə həm şəxsi həyatı, həm də karyerası ilə bağlı xəbərlərlə tez-tez medianın diqqət mərkəzində olub. Xüsusilə qəyyumluq prosesi və hüquqi mübahisələr dünya mətbuatında geniş müzakirə edilmişdi.
Bundan əlavə, 2025-ci ilin sonunda müğənni bütün musiqi kataloqunun hüquqlarını müstəqil nəşriyyat şirkəti Primary Wave-ə satmışdı. Qeyri-rəsmi məlumatlara görə, müqavilənin dəyəri təxminən 200 milyon dollar təşkil edib.
Britni Spirs daha əvvəl ABŞ-da böyük səhnələrə qayıtmaq planının olmadığını da açıqlamışdı. O, bu qərarını şəxsi səbəblərlə əlaqələndirmişdi.
Hazırkı hadisə ilə bağlı isə əlavə detalların yaxın günlərdə açıqlanacağı gözlənilir.
