Azərbaycanda, Çində, Türkiyədə və Qırğızıstanda bir sıra şirkətlərin sahibi olan iş adamı Rövşən Mehdiyev həbs olunub.
Daylinews-az xəbər verir ki, o, dələduzluqda ittiham edilir. Rövşən Mehdiyev Azərbaycanın Union Logistika adlı loqistika şirkətinin rəhbəri kimi cinayət məsuliyyətinə cəlb olunub. Müəyyən müddət əvvəl şirkətin müştəriləri Çindən sifariş etdikləri məhsulların aylarla gecikdirilməsindən şikayət etmişdilər. O zaman şirkət nümayəndəsi malların yanvar ayının sonuna qədər çatdırılacağını bildirmişdi.
Daxili İşlər Nazirliyinin Kiber Cinayətkarlığa Qarşı Mübarizə Baş İdarəsinin apardığı istintaq nəticəsində, şirkət rəhbəri Rövşən Mehdiyev cinayət məsuliyyətinə cəlb edilib.
İstintaq orqanı iş adamının azadlığa buraxılmasına razı olmayıb. Bunun səbəbi isə zərərçəkmişlərin hələ də şikayətçi olması və istintaq prosesinə maneələrin yaranmaması zərurətidir. Zərərçəkmişlərə vurulan maddi ziyan təxminən yarım milyon manat təşkil edir.
Nərimanov Rayon Məhkəməsinin qərarı ilə Rövşən Mehdiyevə 4 aylıq həbs qətimkan tədbiri seçilib.
Qeyd edək ki, Rövşən Mehdiyev eyni zamanda Caspian Energy Clubun Qırğızıstandakı nümayəndəliyinin rəhbəri olub. Bu klub dünyanın 50 ölkəsindən 5,000-dən çox şirkəti birləşdirir. 20 ilə yaxındır biznes fəaliyyəti ilə məşğul olan Mehdiyev Çində Falson, Qırğızıstanda Brok Magistr, Türkiyədə AEMİ şirkətlərinin rəhbəridir. 2022-ci ildə o, Azərbaycanda Union Logistika adlı şirkəti təsis edib.
