Azərbaycanda insan papilloma virusuna (HPV) qarşı peyvəndin yaxın gələcəkdə pulsuz tətbiq ediləcəyi gözlənilir. Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı bu barədə məlumat verib.
“Səhiyyə Nazirliyinin HPV peyvəndini profilaktik vaksinasiya təqviminə daxil etmək üzərində çalışdığını bilirik. Biz bu təşəbbüsü tam dəstəkləyirik, çünki HPV peyvəndi qadınları uşaqlıq boynu xərçəngindən qorumaq üçün təhlükəsiz və effektiv üsuldur”, – deyə ÜST rəsmisi bildirib.
Hande Harmancı əlavə edib ki, Səhiyyə Nazirliyi və ÜST bu peyvəndin peyvənd təqviminə daxil edilməsində maraqlıdır.
HPV Peyvəndi Artıq Avropada Pulsuzdur
- HPV peyvəndi 2006-cı ildən etibarən uşaqlıq boynu xərçənginin qarşısının alınması üçün istifadə edilir.
- Avropanın əksər ölkələrində peyvənd rəsmi peyvənd təqviminə daxil edilib və dövlət tərəfindən pulsuz təmin olunur.
Azərbaycanın da bu sistemə qoşulması ilə qadınların xərçəngdən qorunması üçün mühüm bir addım atılmış olacaq.
