Bu gündən etibarən “Abşeron” Ticarət Mərkəzində avtovağzal xidmətləri fəaliyyətə başlayıb. Xidmət Azerbaijan Ground Service şirkəti tərəfindən təşkil edilib. Bakının Beynəlxalq Avtovağzal Kompleksi bu yeniliyin məqsədinin ticarət mərkəzində və ətraf ərazilərdə sərnişindaşıma fəaliyyətini nizamlı və qanuni şəkildə təşkil etmək olduğunu bildirib. Buradan əsasən Azərbaycanın cənub və qərb bölgələrinə reyslər həyata keçiriləcək.
Bütün avtobuslar yola düşməzdən əvvəl texniki baxışdan keçəcək, sürücülər isə tibbi müayinədən keçiriləcək. Marşrutlar real vaxt rejimində nəzarətdə saxlanılacaq.
Sərnişinlər biletim.az portalı və kassalar vasitəsilə biletlərini əldə edə biləcəklər. Ərazidə məlumat panelləri, təhlükəsizlik sistemləri, rahat gözləmə zalları, dayanacaqlar və iaşə obyektləri yaradılıb. Yeni xidmətin təşkili sərnişinlərin məmnuniyyətini daha da artıracaq.
