Bu gün paytaxt Bakıda sığorta texnologiyaları mövzusunda beynəlxalq səviyyədə önəmli tədbir olan “Türk Dövlətləri Insurtech Zirvəsi” öz işinə başlayıb. İki gün davam edəcək zirvə Azərbaycan Mərkəzi Bankının strateji dəstəyi ilə, Türkiyə Ticarət Nazirliyinin təşkilatçılığı, həmçinin Türkiyənin Xidmət İxracatçıları Birliyi, Azərbaycan Sığortaçılar Assosiasiyası və İstanbul mərkəzli “New Generation Management Company” şirkətinin birgə əməkdaşlığı çərçivəsində reallaşır.
Tədbirə Azərbaycan, Qazaxıstan, Qırğızıstan, Türkiyə, Özbəkistan və Şimali Kipr Türk Respublikasından dövlət rəsmiləri, diplomatik korpusun üzvləri, maliyyə requlyatorları, sığorta assosiasiyalarının rəhbərləri və qabaqcıl texnologiya şirkətlərinin nümayəndələri qatılıb.
Zirvənin əsas mövzusu türk dünyasında sığorta sənayesinin mövcud vəziyyəti və bazar ehtiyaclarının müzakirəsi, eləcə də əməkdaşlıq və inkişaf istiqamətində yeni yol xəritələrinin hazırlanmasıdır. Hər bir iştirakçı ölkənin sığorta bazarlarından ekspertlər rəqəmsal inkişafın davamlılığı və dayanıqlığının təmin olunması yollarını təqdim edir, Türkiyənin qabaqcıl texnologiya firmalarının təcrübəsi müzakirələrdə önəmli yer tutur.
Qeyd edək ki, Azərbaycan bu beynəlxalq sığorta texnologiyaları tədbirinə artıq ikinci dəfə ev sahibliyi edir və bu zirvə regionda rəqəmsal sığorta ekosisteminə yeni nəfəs gətirir.
