Paytaxtın mərkəzində fəaliyyət göstərən “Nine Senses” incəsənət məkanında ABŞ-da yaşayan azərbaycanlı rəssam Vüqar Quliyevin “Dönüş nöqtəsi” adlı fərdi sərgisi tamaşaçılara təqdim ediləcək. Ekspozisiyanın açılışı fevralın 21-də saat 20:00-da baş tutacaq. Layihənin kuratoru Sofiya Frankdır.
Kuratorun sözlərinə görə, son illər dünya miqyasında baş verən hadisələr insan şüuruna və kollektiv yaddaşa ciddi təsir göstərib: “Dünya müxtəlif münaqişələrlə üz-üzədir – Qarabağdan Ukraynaya, Qəzzadan Kəşmirə, Kosovodan Tayvana qədər gərginlik artmaqdadır. Müharibə anlayışı yenidən gündəlik həyatın bir hissəsinə çevrilir və bu, insanların taleyində silinməz izlər buraxır”.
Müharibə və yaddaşın transformasiyası
Konsepsiyada vurğulanır ki, müharibə yaşamış insan əvvəlki həyatına qayıda bilmir. “Hər kəsin həyatında bir dönüş nöqtəsi var – elə bir məqam ki, ondan sonra keçmiş artıq əvvəlki kimi görünmür.
Bu nöqtə həm itki, həm də yeni başlanğıc ola bilər. Müharibə insan təcrübəsinin ən sərt formasıdır və o, həm qaranlığı, həm də içimizdəki müqəddəs duyğuları üzə çıxarır”, – kurator bildirir.
Vüqar Quliyev əsərlərində zaman keçdikcə xatirələrin necə dəyişdiyini, ideoloji və şəxsi təzyiqlər altında necə formalaşdığını araşdırır. Sərgidə nümayiş olunan hər tablo yaddaşda yenidən canlanan, lakin unudulmayan bir anın vizual ifadəsidir.
Rəssam çoxqatlı texnika, kəskin rəng kontrastları və ritmik nöqtələr vasitəsilə zamanın izini göstərməyə çalışır. Onun işlərində həm ağrı, həm də işığa doğru yönələn daxili axtarış hiss olunur.
Məlumat üçün qeyd edək ki, Vüqar Quliyev 1984-cü ildə Azərbaycanda anadan olub. O, 1999-cu ildə Əzim Əzimzadə adına Rəssamlıq Məktəbinə daxil olub, 2003-cü ildən isə təhsilini Azərbaycan Dövlət Rəssamlıq Akademiyasında davam etdirib.
ABŞ-da müxtəlif sərgi və layihələrdə iştirak edən rəssam bir sıra mükafatlara layiq görülüb. “Dönüş nöqtəsi” sərgisi martın 21-dək davam edəcək.
