Dünyanın diqqət mərkəzində olan mühüm görüş – Çin Prezidenti Si Cinpin ilə ABŞ Prezidenti Donald Tramp arasında keçirilən danışıqlar qlobal siyasətdə yeni mərhələnin başlanğıcı kimi qiymətləndirilir. İki saatdan artıq davam edən görüşdə tərəflər həm ikitərəfli münasibətləri, həm də beynəlxalq gündəmin əsas məsələlərini müzakirə ediblər.
Danışıqlar zamanı Yaxın Şərqdəki vəziyyət, Tayvan məsələsi və Rusiya–Ukrayna müharibəsi kimi mövzular əsas müzakirə predmetinə çevrilib. Görüşün ümumi fonunda isə qarşıdurmadan daha çox dialoq və kompromis axtarışı diqqət çəkib.
Pekin və Vaşinqton arasında yumşalma mesajları
Si Cinpin çıxışında Tayvan mövzusuna xüsusi toxunaraq bildirib ki, adanın müstəqilliyi ilə regionda sülhün qorunması bir-birinə zidd anlayışlardır. Çin lideri xəbərdarlıq edib ki, bu məsələ həll olunmazsa, iki ölkə arasında ciddi gərginlik yarana bilər.
Bununla yanaşı, o, ABŞ-ni əməkdaşlığa çağıraraq vurğulayıb ki, Çin–ABŞ iqtisadi əlaqələri qarşılıqlı fayda üzərində qurulub və ticarət müharibələrinin qalibi olmur.
Donald Tramp isə öz növbəsində iki ölkə arasında münasibətlərin daha da yaxşılaşacağına ümid etdiyini bildirib və gələcək əməkdaşlıq üçün müsbət siqnallar verib.
Ekspert rəyi: gərginlikdən dialoqa keçid
Milli Məclisin deputatı Hikmət Babaoğlu görüşü şərh edərkən qeyd edib ki, tərəflər bir çox məsələdə ortaq məxrəcə yaxınlaşıblar:
“Görüşün nəticələri göstərir ki, son illərdə artan gərginlik artıq idarə olunan mərhələyə keçib. ABŞ gömrük rüsumlarının azaldılması istiqamətində addım atmağa hazırdır, Çin isə nadir torpaq elementlərinin ixracı ilə bağlı məhdudiyyətləri yumşaltmağı planlaşdırır”.
Deputatın sözlərinə görə, bu razılaşmalar iki ölkə arasında ticarət əlaqələrinin əvvəlki axarına qayıtması üçün zəmin yaradır.
İran məsələsinə toxunan Babaoğlu bildirib ki, tərəflər tam razılığa gəlməsələr də, müəyyən yaxınlaşma müşahidə olunur. Xüsusilə Hörmüz boğazı ilə bağlı tranzit məsələlərində ortaq mövqenin formalaşdığı ehtimal edilir.
Ümumilikdə, analitiklər hesab edir ki, bu görüş siyasi ziddiyyətlərin fonunda iqtisadi əməkdaşlığın gücləndirilməsi istiqamətində mühüm addım kimi tarixə düşə bilər.
