Çində ağcaqanadlar vasitəsilə yayılan və müalicəsi olmayan Çikungunya virusu sürətlə yayılır. İyulun əvvəlində cəmi bir yoluxma halı qeydə alınmışdısa, hazırda rəsmi məlumatlara görə, 7 000-dən çox insan bu virusa yoluxub. Bu barədə Independent nəşri məlumat yayıb.
Çikungunya virusu: simptomlar və təhlükələr
Çikungunya lişoradkası Afrika, Asiya, Cənubi Amerika və Hind okeanı adalarında müntəzəm olaraq müşahidə olunsa da, Şimali Amerika və Avropada da ayrı-ayrı hallar qeydə alınıb. Çində, xüsusilə də Honqkonqa yaxın olan Quansdonq əyalətində virus sürətlə yayılır. Yalnız iyulun son həftəsində bu əyalətdə təxminən 3 000 yeni yoluxma halı aşkar edilib.
Virusun simptomları yoluxmadan bir neçə gün sonra ortaya çıxır:
- Bədən hərarətinin 40 dərəcəyə qədər yüksəlməsi.
- Baş və əzələ ağrıları.
- Şiddətli yorğunluq və ürəkbulanma.
- Dəridə səpgilər.
- Bəzən aylarla, hətta illərlə davam edən güclü oynaq ağrıları.
Bəzi hallarda virus sinir sisteminə, ürək-damar sisteminə və gözlərə zərər verə bilər. Bu, əlilliyə və ya nadir hallarda ölümlə nəticələnə bilər.
Müalicə və qorunma yolları
Hazırda Çikungunya virusuna qarşı xüsusi müalicə yoxdur. Tibbi yardım yalnız simptomları yüngülləşdirməyə yönəlib. Kəskin mərhələ bir neçə gündən bir neçə həftəyə qədər davam edir, lakin oynaq ağrıları uzun müddət qala bilər.
ABŞ Xəstəliklərə Nəzarət və Profilaktika Mərkəzi (CDC) Çində olan və ya ora səyahət edən şəxsləri ağcaqanad dişləmələrinə qarşı qorunmağa çağırıb. CDC həmçinin virusun Çinin digər bölgələrinə yayılma riskinin olduğunu vurğulayıb. “119 ölkədə, ümumilikdə 5,6 milyard insanın yaşadığı ərazilərdə Çikungunya virusunun yayılma riski var,” – Ümumdünya Səhiyyə Təşkilatının (ÜST) tibb işçisi Diana Roxas-Alvares bildirib.
Virusun sürətlə mutasiya edərək yeni şərtlərə uyğunlaşması bu təhlükəni daha da artırır.
Çinin mübarizə tədbirləri
Çin hökuməti virusun yayılmasının qarşısını almaq üçün təcili tədbirlər görür:
- Quansdonq əyalətində və ətraf ərazilərdə ağcaqanadların məhv edilməsi kampaniyaları.
- Əhaliyə ağcaqanad torları və spirallardan istifadə etmək tövsiyəsi.
- Daxili məkanlarda ağcaqanadlara qarşı mübarizə tədbirləri.
Bu tədbirlərə baxmayaraq, virusun sürətli yayılması qlobal səhiyyə üçün potensial təhlükə kimi qiymətləndirilir.
