Bu gün Rusiya Federasiyasının Sankt-Peterburq şəhərində COP28 Birləşmiş Ərəb Əmirlikləri (BƏƏ), COP29 Azərbaycan və COP30 Braziliya Sədrliklərinin mədəniyyət nazirləri arasında üçtərəfli görüş baş tutub.
Daylinews-az.com-nın verdiyi məlumata görə, görüşün əsas məqsədi COP29 çərçivəsində təşkil olunacaq mədəniyyət nazirlərinin İkinci Yüksək Səviyyəli Görüşünün proqram və formatını müəyyən etmək idi. Bu vacib görüşdə Azərbaycan mədəniyyət naziri Adil Kərimli, BƏƏ mədəniyyət naziri Səlim bin Xalid Əl Qassimi və Braziliya mədəniyyət naziri Marqaret Menezes iştirak ediblər.
Xatırladaq ki, COP27 zamanı Şarm Əl-Şeyxdə iqlim tədbirlərində mədəniyyətin roluna xüsusi diqqət ayrılmağa başlanmışdı. COP28-də, BƏƏ və Braziliya sədrliklərinin təşəbbüsü ilə “Mədəniyyətə Əsaslanan İqlim Fəaliyyəti üzrə Əmirliklər Bəyannaməsi” qəbul edilmişdi. Bu bəyannamə, 30-dan çox nazir, hökumət nümayəndələri və beynəlxalq təşkilatların rəhbərlərinin iştirakı ilə mədəniyyətin iqlim dəyişikliyi ilə mübarizədəki əhəmiyyətini müzakirə edən Birinci Yüksək Səviyyəli Görüş çərçivəsində qəbul olunmuşdu.
Azərbaycan da iqlim fəaliyyətində mədəniyyətin əhəmiyyətini daim diqqət mərkəzində saxlayır və bu sahədə qlobal müzakirələrin aparılmasında fəal iştirak edir. Bu istiqamətdə 1-3 may tarixlərində Bakıda keçirilən VI Ümumdünya Mədəniyyətlərarası Dialoq Forumu çərçivəsində aparıcı iqlim və mədəni irs mütəxəssislərinin iştirakı ilə xüsusi plenar sessiya təşkil olunmuşdu.
Görüş zamanı BƏƏ və Braziliya tərəfləri Azərbaycanın bu məsələyə olan davamlı diqqətini yüksək qiymətləndirərək, ölkənin beynəlxalq səviyyədəki fəaliyyətinə görə təşəkkürlərini ifadə ediblər. Eyni zamanda, hər iki ölkənin mədəniyyət nazirləri COP29-un hazırlıq işlərini yüksək dəyərləndirərək, Bakıda baş tutacaq tədbirin xüsusi yaddaqalan olacağına əminliklərini bildiriblər.
Görüş çərçivəsində nazirlər COP29 zamanı keçirilməsi planlaşdırılan əlavə tədbirlər, təşəbbüslər, konsert və şou proqramlarla bağlı da müzakirələr aparıblar.
