Daxili İşlər Nazirliyi (DİN) bank kartlarına yönəlik müdaxilələrin artması fonunda vətəndaşları daha diqqətli olmağa çağırıb. Qurum təhlükəsizlik qaydalarına əməl etməyin vacibliyini bir daha vurğulayıb.
Vətəndaşlar aşağıdakı təhlükəsizlik tədbirlərinə riayət etməlidirlər:
- Naməlum nömrələrdən gələn zəngləri cavablandırmamaq. Bu nömrələrdən çox vaxt dələduzluq məqsədilə zənglər edilə bilər.
- Şübhəli məsajlara cavab verməmək. Məsələn, “Bonus qazandınız”, “Hesabınız bloklanıb” və ya “Təcili ödəniş edin” kimi SMS-lər tələ ola bilər.
- İnamı olmayan linklərə daxil olmamaq. Saxta saytlar vasitəsilə kart məlumatları ələ keçirilə bilər.
- Heç bir şəxsə şəxsi məlumatlarınızı, o cümlədən PIN, CVV, 16 rəqəmli kart nömrəsi və SMS təsdiqi kodlarını verməmək.
Eyni zamanda, DİN qeyd edir ki, bank əməkdaşları heç vaxt müştərilərdən şəxsi kart məlumatlarını tələb etmirlər. Şübhəli hallarda dərhal bank və hüquq-mühafizə orqanlarına məlumat verilməlidir.
