“Eurovision 2026” mahnı müsabiqəsinin ikinci yarımfinal mərhələsi Avstriyanın paytaxtı Vyanada möhtəşəm şou ilə baş tutub. Wiener Stadthalle arenasında keçirilən gecənin sonunda Böyük finala vəsiqə qazanan son 10 iştirakçı bəlli olub.
70-ci yubiley müsabiqəsinin bu mərhələsində səhnəyə çıxan ifaçılar yüksək səviyyəli performansları ilə diqqət çəkiblər. Aparıcılar Viktoriya Swarovski və Mixael Ostrovski tamaşaçılara unudulmaz anlar yaşadıblar.
İkinci yarımfinalın nəticələrinə əsasən aşağıdakı ölkələr Böyük finala vəsiqə qazanıblar (elan olunma sırasına görə):
- Bolqarıstan – DARA – “Bangaranga”
- Ukrayna – LELÉKA – “Ridnym”
- Norveç – JONAS LOVV – “YA YA YA”
- Avstraliya – Delta Goodrem – “Eclipse”
- Rumıniya – Alexandra Căpitănescu – “Choke Me”
- Malta – AIDAN – “Bella”
- Kipr – Antigoni – “JALLA”
- Albaniya – Alis – “Nân”
- Danimarka – Søren Torpegaard Lund – “Før Vi Går Hjem”
- Çexiya – Daniel Zizka – “CROSSROADS”
Bu iştirakçılar artıq mayın 16-da keçiriləcək Böyük finalda çıxış edəcəklər.
Yarışdan kənarda qalanlar və səsvermə sistemi
Gecənin sonunda bəzi ölkələr üçün yarış başa çatıb. Bu yarımfinal mərhələsində Azərbaycan təmsilçisi JIVA (“Just Go”) finala yüksələ bilməyib. Bundan əlavə, Lüksemburq, Ermənistan, İsveçrə və Latviya da finaldan kənarda qalan ölkələr sırasında yer alıb.
Səsvermə qaydalarına əsasən nəticələr həm münsiflər heyətinin, həm də tamaşaçıların səsləri əsasında müəyyənləşdirilib. Ümumi nəticədə hər iki tərəfin səsi 50 faiz paya malik olub.
Yarımfinalda iştirak edən 15 ölkə ilə yanaşı, Fransa və Böyük Britaniya da səsvermədə iştirak edib. Finala vəsiqə qazanan ifaçılar eyni zamanda çıxış edəcəkləri hissələri də püşk yolu ilə müəyyənləşdiriblər.
Qeyd edək ki, Böyük finalda yarımfinal qaliblərinə əlavə olaraq “Böyük dördlük” (Fransa, Almaniya, İtaliya və Böyük Britaniya) və ev sahibi Avstriya da çıxış edəcək.
