Amerikanın “İnter Mayami” klubunun və Argentina millisinin ulduzu Lionel Messi beynəlxalq səviyyədə daha bir zirvəni fəth edib. O, Beynəlxalq Futbol Tarixi və Statistikaları Federasiyası (IFFHS) tərəfindən futbol tarixinin ən yaxşı oyunçusu adına layiq görülüb.
Üçlüyə kimlər düşdü?
IFFHS-nin rəsmi saytında yayımlanan reytinqə əsasən, Messidən sonra ikinci yeri Braziliya əfsanəsi Pelé, üçüncü yeri isə digər argentinalı, futbolun simvolu sayılan Dieqo Maradona tutub.
Futbol ictimaiyyəti üçün bir qədər təəccüblü hal isə Kriştianu Ronaldonun ilk üçlükdə yer almaması olub. Beş dəfə “Qızıl top”u qazanmış portuqaliyalı ulduz, Avropa çempionu və müxtəlif liqalarda rekordlara imza atsa da, yalnız dördüncü sırada qərarlaşıb.
Messinin irsi
Qeyd edək ki, Lionel Messi futbolda 8 dəfə “Ballon d’Or” qazanaraq bu nominasiyada tarixə düşüb. O, həmçinin Argentina millisinin heyətində dünya çempionu olmaqla yanaşı, “Barselona” və digər klublarda onlarla kubok və fərdi mükafatın sahibidir.
