Haitidə dramatik hadisə yaşanıb: yerli küçə satıcısı olan bir qadın, ailə üzvlərinin ölümünə görə quldur dəstəsindən qisas almaq üçün onları zəhərli piroqla qətlə yetirib. Daylinews-az.com xəbər verir ki, məlumatı “Oddity Central” yayıb.
“Təşəkkür piroqları” ölüm gətirdi
May ayının əvvəlində Port-o-Prens şəhərində küçə yeməkləri satan qadın, Viv Ansanm adlı cinayətkar dəstənin üzvlərinə “rayonu qoruduqları üçün minnətdarlıq” əlaməti olaraq pulsuz piroqlar təklif edib. Quldurlar yeməkləri qəbul etdikdən az sonra qarnında şiddətli ağrılar və qusma halları müşahidə olunub. Qısa müddətdə məlum olub ki, 40-dan çox dəstə üzvü zəhərlənərək ölüb. Onları xilas etmək mümkün olmayıb.
Qisas planı: qadın hər şeyi etiraf etdi
Hadisədən sonra qadın könüllü şəkildə polisə təslim olaraq baş verənləri etiraf edib. O bildirib ki, bu cinayətkarlar ailə üzvlərindən bir neçəsini amansızcasına qətlə yetirib, buna görə də belə bir plan qurub. İstintaq göstərib ki, qadın piroqlara güclü kənd təsərrüfatı pestisidi əlavə edib. Bu maddə insan üçün ölümcül zəhər hesab olunur.
Hüquqi nəticələr hələ bəlli deyil
Hazırda qadına qarşı hansı maddələr üzrə ittiham irəli sürüləcəyi açıqlanmayıb. Onun hərəkəti ölkədə birmənalı qarşılanmayıb: bəziləri bunu qəhrəmanlıq, bəziləri isə təhlükəli presedent kimi qiymətləndirir.
