“WhatsApp” messengeri iPhone istifadəçiləri arasında yeni dizayn interfeysinin məhdud sınaqlarına başlayıb. Xəbər verir ki, bu barədə ixtisaslaşmış WABetaInfo portalı məlumat yayıb. Bildirilir ki, 25.28.75 versiyalı tətbiqi istifadə edən bəzi istifadəçilərdə yeni görünüş aktivləşdirilib, lakin Meta şirkəti hələ rəsmi açıqlama verməyib.
Yenilik əsasən aşağıdakı naviqasiya panelində nəzərə çarpır. Liquid Glass (mayeləşmiş şüşə) tərzi ilə hazırlanmış panel iOS-un müasir dizayn qaydalarına uyğun yarımşəffaf vizual effektə malikdir. Bu dəyişiklik server tərəfində mərhələli şəkildə aktivləşdirilir, yəni eyni proqram versiyasını istifadə edən bütün istifadəçilərdə yeni interfeys hələ mövcud deyil.
Qeyd edək ki, iOS 26 üslubunda oxşar dizayn yeniliklərinin yaxın zamanda Telegram messengerində də tətbiq olunacağı planlaşdırılır və bəzi elementlər artıq beta versiyada görünüb.
