İran milli komandasının 2026-cı il futbol üzrə dünya çempionatında iştirakdan imtina edəcəyi ilə bağlı yayılan məlumatlara aydınlıq gətirilib. Son açıqlamalara görə, komanda hazırda turniri boykot etmək niyyətində deyil.
Asiya Futbol Konfederasiyasının (AFK) baş katibi Vindsor Con bildirib ki, İran tərəfi quruma rəsmi şəkildə belə bir qərar barədə məlumat verməyib. Əksinə, federasiya yığmanın mundialda iştirakını təmin etmək istiqamətində fəaliyyət göstərir.
Vindsor Con məsələ ilə bağlı bildirib:
“Onlar AFK-nın üzvüdürlər və biz onların yarışda iştirak etməsini istəyirik. Bildiyimizə görə, İran mundialda çıxış edəcək. Bu məsələ ətrafında emosiyalar yüksəkdir və müxtəlif fikirlər səslənir. Lakin yekun qərarı İran Futbol Federasiyası verir və hazırda onlar turnirdə iştirak edəcəklərini bizə bildiriblər”.
Qeyd edək ki, İran yığmasının oyunlarını ABŞ-ın Sietl və Los-Anceles şəhərlərində keçirməsi planlaşdırılır.
Alternativ planlar və siyasi açıqlamalar
Bununla yanaşı, ehtimal edilən risklər nəzərə alınaraq Beynəlxalq Futbol Federasiyası (FİFA) mümkün imtina halı üçün alternativ variantlar üzərində də işləyir. Digər tərəfdən, ABŞ prezidenti Donald Tramp İran millisinin turnirdə iştirak etməsinin məqsədəuyğun olmadığını bildirmişdi ki, bu da mövzunun daha geniş müzakirəsinə səbəb olub.
Xatırladaq ki, püşkatmanın nəticələrinə əsasən İran millisi final mərhələsində Belçika, Misir və Yeni Zelandiya ilə eyni qrupda yer alıb.
