Azərbaycanda süni intellekt vasitəsilə hazırlanan saxta foto, audio və video materialların yayılmasına qarşı cəzalar sərtləşdirilir. Bununla bağlı Cinayət və Cinayət-Prosessual məcəllələrinə dəyişikliklər Milli Məclisin plenar iclasında müzakirəyə çıxarılıb.
Yeni qanun layihəsinə əsasən, şəxsin razılığı olmadan onun səsi və ya görüntüsü əsasında reallığı əks etdirməyən materialların hazırlanması və yayılması artıq cinayət məsuliyyəti yaradacaq. Bu cür hallarda həmin materialların media və ya internet resurslarında yayılması da hüquqi məsuliyyətə səbəb olacaq.
Cəzalar: cərimədən həbsədək
Təklif olunan dəyişikliklərə görə, bu əməllərə yol verən şəxslər aşağıdakı cəzalarla üzləşə bilər:
- 3 000 manatdan 7 000 manatadək cərimə
- 360 saatdan 480 saatadək ictimai işlər
- 3 ilədək azadlığın məhdudlaşdırılması
- 3 ilədək azadlıqdan məhrumetmə
Eyni zamanda, qanun pozuntusu daha ağır hallarda törədilərsə, cəzalar da sərtləşdiriləcək.
Ağırlaşdırıcı hallar ayrıca nəzərə alınacaq
Əgər bu cür əməllər bir qrup şəxs tərəfindən və ya əvvəlcədən razılaşma əsasında törədilərsə, yaxud bir neçə nəfərə qarşı həyata keçirilərsə, daha ciddi məsuliyyət nəzərdə tutulur.
Həmçinin şəxsin şərəf və ləyaqətini alçaltmaq, onu nüfuzdan salmaq məqsədilə və ya xidməti fəaliyyəti ilə əlaqədar edilən hallarda da cəza ağırlaşdırılır. Bu kimi vəziyyətlərdə təqsirkar şəxslər 3 ildən 5 ilədək müddətə azadlıqdan məhrum edilə bilərlər.
Qanun layihəsi müzakirələrdən sonra səsverməyə çıxarılıb və birinci oxunuşda qəbul edilib. Dəyişikliklərin qəbul olunması informasiya təhlükəsizliyinin gücləndirilməsi və süni intellektdən sui-istifadə hallarının qarşısının alınması məqsədi daşıyır.
