Rəqəmsal hökumət platforması olan “mygov” üzərindən vətəndaşlara yeni bir xidmət təqdim edilib. İndi “İş yerinə dair arayışın alınması” də xidməti sistemə inteqrasiya edilib və vətəndaşlar bu sənədi birbaşa “mygov” vasitəsilə asanlıqla əldə edə bilərlər.
Bu yenilik İnnovasiya və Rəqəmsal İnkişaf Agentliyi ilə Əmək və Əhalinin Sosial Müdafiəsi Nazirliyinin əməkdaşlığı nəticəsində reallaşıb. Arayış elektron formatda (PDF) yüklənir və viza, kredit, ipoteka kimi rəsmi məqsədlər üçün təqdim oluna bilər.
Xidmətdən istifadə etmək üçün:
- Vətəndaş “mygov”un “Xidmətlər” bölməsində “Məşğulluq” kateqoriyasına daxil olaraq “İş yerinə dair arayışın alınması” xidmətini seçir.
- Sistem avtomatik olaraq aktiv əmək müqaviləsini yoxlayır və uyğun müqaviləni müəyyən edir.
- İstifadəçi əməkhaqqının göstərilməsini, arayışın məqsədini və əlaqə nömrəsini təyin edir.
- Əgər arayış müəyyən quruma təqdim ediləcəksə, həmin qurumun VÖEN-i və ya adı daxil edilir.
- Təsdiq olunduqdan sonra sənədə unikal nömrə və QR kod əlavə olunur.
Yaradılan sənəd elektron formada yüklənə və istənilən quruma təqdim edilə bilər. Həmçinin, kənar təşkilatlar və fərdlər sənədin doğruluğunu “my.gov.az” portalında və QR kod vasitəsilə yoxlaya bilərlər.
Bu yeni xidmət dövlət xidmətlərinin rəqəmsallaşması istiqamətində atılan önəmli addımlardan biridir və vətəndaşların gündəlik işlərini daha sürətli və rahat həyata keçirməsinə şərait yaradır.
