ABŞ-ın vitse-prezidenti Cey Di Vens tələbələr arasında keçirilən Amerika futbolu üzrə NCAA çempionatının kubokunu təsadüfən sındırıb. Hadisə ölkə başçısı Donald Tramp və digər rəsmi şəxslərin iştirakı ilə Ağ Evdə baş tutan qəbul zamanı baş verib.
Bu mövsümün qalibi olan Ohayo Universitetinin komandası yüksək səviyyədə qəbul olunmaq üçün Ağ Evə dəvət edilmişdi. Prezident Tramp və komandanın baş məşqçisi Rayan Dey çıxış etdikdən sonra, mərasim Ağ Evin cənub çəmənliyində davam edib.
Ohayo ştatından olan və özü də bu regionla bağlılığı olan Vens kuboku havaya qaldırmaq istəyəndə, onun konstruksiyasını nəzərə almadan hərəkət edib. Belə ki, kubokun yuxarı hissəsi asanlıqla əsas hissədən ayrılır və məhz bu səbəbdən o, Vensin əllərində dağılaraq yerə düşüb.
Komandanın lideri Treyvion Henderson vəziyyəti nəzarətə almağa çalışıb və kubokun yuxarı hissəsini havada tuta bilib. Aşağı hissəni isə Vens yerə düşəndən sonra qaldıraraq bir yerə toplayıb.
Hadisədən sonra vitse-prezident sosial şəbəkə “X”də yumorla dolu paylaşım edib: “Sadəcə istəmirdim ki, bu kubok Ohayo ştatından olmayan bir komandaya qismət olsun. Ona görə sındırdım,” – deyə o zarafatla qeyd edib.
