79-cu Kann Film Festivalının proqramı açıqlanıb və bu il seçim açıq şəkildə müəllif kinosuna yönəlib. Təşkilatçılar iri büdcəli kommersiya layihələrindən uzaqlaşaraq daha çox festival və intellektual filmlərə üstünlük veriblər. 141 ölkədən rekord sayda – 2541 film təqdim edilməsi isə rəqabətin nə qədər yüksək olduğunu göstərir.
Artıq ilk müzakirələrdə əsas favoritlər də formalaşmağa başlayıb. Xüsusilə Pedro Almodovarın “Acı Milad”, Asqar Fərhadinin “Paralel hekayələr” və Pavel Pavlikovskinin “Vətən” filmləri tənqidçilər tərəfindən öncədən ən güclü namizədlər kimi qiymətləndirilir.
Əsas müsabiqənin filmləri
Bu il “Qızıl Palma budağı” uğrunda mübarizə aparacaq filmlər:
- “Acı Milad” – Pedro Almodovar
- “Paralel hekayələr” – Asqar Fərhadi
- “Vətən” – Pavel Pavlikovski
- “Ümid” – Na Hon Cin
- “Fiyord” – Kristian Munçiu
- “Minotavr” – Andrey Zvyagintsev
- “Sevilən insan” – Rodriqo Sorogoyen
- “Sevdiyim adam” – Ayra Saks
- “Moulin” – Laslo Nemes
- “Gecənin hekayəsi” – Lea Misius
- “Bizim xilasımız” – Emmanuel Marre
- “Zərif canavar” – Mari Kroyçer
- “Naqi qeydləri” – Koji Fukada
- “Qutudakı qoyun” – Hirokazu Koreeda
- “Garans” – Jeanne Herry
- “Naməlum” – Artur Harari
- “Birdən-birə” – Ryusuke Hamaguchi
- “Yuxuda macəra” – Valeska Grisebach
- “Qorxaq” – Lukas Dhont
- “Qara top” – Xavyer Ambrossi və Xavyer Kalvo
- “Qadın həyatı” – Şarlin Burjua-Takke
Bu il əsas sual açıq qalır: görəsən təcrübəli ustadlardan biri qalib olacaq, yoxsa sürpriz müəllif ortaya çıxacaq? Son illərin tendensiyasına baxsaq, Kann tez-tez gözlənilməz qaliblərlə yadda qalır.
Bundan əlavə, qadın rejissorların rekord sayda iştirakı və ABŞ-ın yalnız bir film ilə təmsil olunması da festivalın dəyişən balansını göstərir.
Fəxri “Qızıl Palma budağı” isə Barbra Streisand və Peter Jacksona təqdim olunacaq. Festival mayın 12-də Pyer Salvadorinin komediyası ilə start götürəcək.
