Hollivudda böyük maraq doğuran yeni layihə ilə bağlı ilk rəsmi təsdiq gəlib. Kristian Beyl rejissor Maykl Mannın kult sayılan “İstilik” (“Heat”) filminin davamında rol alacağını açıqlayıb. Aktyorun sözlərinə görə, çəkilişlərin Çikaqoda aparılması planlaşdırılır.
Məlumatlara əsasən, Beylin tərəf müqabili kimi Leonardo Di Kaprionun da layihəyə cəlb olunacağı ehtimal edilir. Bu baş tutarsa, iki məşhur aktyor ilk dəfə eyni filmdə bir araya gəlmiş olacaq.
“İstilik 2” fərqli quruluşda olacaq
“İstilik 2” klassik davam filmi formatında çəkilməyəcək. Ssenari Maykl Mann və Meq Qardinerin eyniadlı romanı əsasında hazırlanıb. Əsərdə hadisələr iki zaman xətti üzrə inkişaf edir. Birinci xətt 1980-ci illərdə Çikaqoda – 1995-ci ildə ekranlaşdırılan orijinal filmdəki hadisələrdən əvvəl baş verənləri əhatə edir. İkinci xətt isə tamaşaçını 2000-ci illərin əvvəlinə aparır.
Bu yanaşma həm keçmişə qayıdış, həm də yeni dövrün hadisələrini paralel təqdim etməklə süjetə daha geniş miqyas qazandırır. Layihənin böyük büdcəli və dinamik cinayət dramı olacağı gözlənilir.
Qeyd edək ki, Kristian Beyl və Maykl Mann daha əvvəl də birlikdə çalışıblar. Onlar “Xalq düşmənləri” (“Public Enemies”) adlı qangster dramında əməkdaşlıq ediblər. Həmin film ABŞ-da Federal Təhqiqat Bürosunun formalaşma dövrünü və bank soyğunları dalğasını əks etdirirdi.
Yeni layihə ilə bağlı rəsmi aktyor heyəti hələ tam açıqlanmasa da, “İstilik 2”nin kino dünyasında böyük səs-küy yaradacağı artıq indidən proqnozlaşdırılır.
