Madaqaskar hökuməti ölkəyə yenidən yaxınlaşan “Gezani” tropik siklonu ilə əlaqədar ən yüksək – qırmızı təhlükə səviyyəsi elan edib. Rəsmi qurumlar əhaliyə və dəniz nəqliyyatı sahiblərinə fövqəladə vəziyyət qaydalarına əməl etməyi tapşırıb.
Məlumata əsasən, siklonun episentri hazırda adanın cənub-qərb sahillərindən təxminən 240 kilometr aralıdadır. Sinoptiklərin proqnozuna görə, təbii fəlakət axşam saatlarında quruya çatacaq və ən ciddi zərbəni cənub bölgələrinə endirəcək.
Güclü külək və təhlükəli istiqamət
“Gezani”nin mərkəzində küləyin sürəti saatda 100 kilometrə çatır, bəzi ərazilərdə isə bu göstərici 140 kilometr/saatadək yüksəlir. Əsas zərbənin Andruy vilayətinin Ampanixi-İtampulu rayonu istiqamətində gözlənildiyi bildirilir.
Səlahiyyətli qurumlar cənub-qərb rayonlarında yaşayan sakinlərə evlərini tərk etməməyi, açıq ərazilərə çıxmamağı tövsiyə edir. Eyni zamanda, dəniz nəqliyyatı üçün limanları tərk etməmək barədə göstəriş verilib. Fövqəladə xidmətlər yüksək hazırlıq rejiminə keçib.
Qeyd edək ki, fevralın 10-11-də “Gezani” artıq Madaqaskar ərazisindən keçmiş və ciddi fəsadlar törətmişdi. Həmin vaxt 43 nəfər həyatını itirmiş, təxminən 260 min nəfər müxtəlif dərəcədə zərər görmüşdü. Ölkənin ikinci ən böyük liman şəhəri olan Toamasina böyük dağıntılarla üzləşmişdi.
Siklon daha sonra Mozambik kanalını keçərək Mozambik sahilləri boyunca hərəkət etmiş və hazırda yenidən Madaqaskar istiqamətinə qayıdıb. Meteoroloqlar növbəti günlərin riskli olacağını bildirir.
