Əgər son zamanlar izaholunmaz yorğunluq, əzələ spazmları və ya əhval dəyişiklikləri ilə qarşılaşırsınızsa, bədəniniz maqnezium çatışmazlığı barədə sizə siqnal verir ola bilər.
Maqnezium orqanizmdə enerji istehsalından tutmuş əzələ və sinir sisteminin düzgün işləməsinə qədər bir çox vacib funksiyanı yerinə yetirir. Ancaq bir çox insan bu mineralı kifayət qədər qəbul etmir. ABŞ-da sağlamlıq üzrə ekspert Kriss Freytag bu barədə bloqunda ətraflı məlumat verir.
Aşağıdakı əlamətlərə fikir verin – onlar maqnezium əskikliyindən xəbər verə bilər:
1. Əzələ spazmları və qıcolmalar
Əgər bəzən qəfildən ayaq əzələniz çəkilirsə və ya əzələlərdə titrəmə hiss edirsinizsə, bu maqneziumun azlığına işarədir. Bu mineral əzələlərin rahatlaşması üçün vacibdir.
2. Xroniki yorğunluq və zəiflik
Daim yorğun və halsızsanız, bunun səbəbi hüceyrə səviyyəsində enerji istehsalında iştirak edən maqneziumun çatışmamasıdır.
3. Narahatlıq və depressiya
Maqnezium sinir sisteminin balansını qoruyur. Onun azlığı stresə, narahatlığa və hətta depressiyaya səbəb ola bilər.
4. Yuxusuzluq və yuxu problemləri
Əgər gecə yuxuya getməkdə çətinlik çəkirsinizsə və ya tez-tez oyanırsınızsa, maqnezium səviyyəsini nəzərdən keçirməyə dəyər.
5. Ürək ritminin pozulması
Arada ürəkdə sıçrayış və ya nizamsız döyüntülər hiss edirsinizsə, bu da maqnezium çatışmazlığının əlaməti ola bilər.
6. Baş ağrısı və miqren
Araşdırmalar göstərir ki, aşağı maqnezium səviyyəsi beyində damarların daralmasına və baş ağrılarına səbəb ola bilər.
7. Yüksək təzyiq
Maqnezium damarları genişləndirərək təzyiqin sabit qalmasına kömək edir. Onun çatışmazlığı hipertoniya riskini artırır.
8. Həzm problemləri
Qəbizlik, şişkinlik və digər həzm pozuntuları da maqnezium əskikliyindən qaynaqlana bilər.
9. Uyuşma və iynələnmə hissi
Əllərdə və ayaqlarda tez-tez uyuşma və ya iynələnmə hiss edirsinizsə, sinir sisteminiz maqneziuma ehtiyac duyur.
Nə etməli?
Əgər bu simptomlardan bir neçəsi sizdə müşahidə olunursa, maqneziumla zəngin məhsullara üstünlük verin:
- Qoz, badam, günəbaxan və kətan tumları
- Yaşıl yarpaqlı tərəvəzlər (ispanaq, brokkoli)
- Paxlalılar və tam taxıllar
- Banan və avokado
Əgər qida vasitəsilə maqneziumu yetərincə almaq mümkün deyilsə, həkim məsləhəti ilə əlavə preparatlardan istifadə etmək olar.
