Google, Android 15 əməliyyat sistemi üçün cihaz sertifikatlaşdırma tələblərini sərtləşdirib. Bu dəyişikliklər nəticəsində bir çox istehsalçılar əvvəlki kimi ucuz və zəif texniki göstəricilərə malik smartfonları bazara çıxara bilməyəcəklər.
Əsas tələblərdən biri: cihazın ən azı 32 GB daimi yaddaşa sahib olmasıdır. Bunun 75%-i istifadəçiyə əlçatan olmalıdır. Bu şərt yerinə yetirilməyən cihazlar yalnız Android-in açıq mənbə kodlu versiyası (AOSP) ilə işləyə biləcək. Google-un mobil xidmətləri (GMS) üçün sertifikat almaq və Play Store kimi tətbiqlərə çıxış əldə etmək istəyən istehsalçılar isə bu tələblərə tam əməl etməlidirlər.
Əlavə texniki şərtlər:
- 2 və ya 3 GB RAM ilə təchiz olunmuş cihazlar sistem resurslarını optimallaşdırmalıdır.
- 4 GB RAM olan cihazlar üçün bu optimallaşdırmalar tövsiyə xarakteri daşıyır.
- Qrafik imkanlar: Android 15 işlədən cihazlar Vulkan 1.3 və ya daha yeni versiyaları dəstəkləməli, eyni zamanda ANGLE kitabxanaları ilə OpenGL ES əsaslı tətbiqlərlə uyğunluq təmin etməlidirlər.
Tövsiyə edilən əlavə xüsusiyyətlər:
- Bluetooth 5.0 və ya daha üst versiyalar – eşitmə cihazları ilə uyğunluq üçün.
- Widevine L1 protokolu üçün hardware dekoder – video axın xidmətlərində daha yüksək keyfiyyətə imkan verir.
Gözlənilən dəyişikliklər: Bu texniki göstəricilər Android 16 ilə birlikdə məcburi olacaq. Son olaraq, Google həm də yeni tələblərə əsasən, cihazların fövqəladə hallarda yer təyin edən xidmətlərə istifadəçinin təcili əlaqə məlumatlarını ötürə bilməsini şərt kimi irəli sürür.
