Meta şirkəti istifadəçilər üçün yeni ünsiyyət formatı üzərində işləyir. Şirkət “Instants” adlı ayrıca tətbiqi test edir ki, bu platforma vasitəsilə istifadəçilər yalnız bir dəfə baxıla bilən və qısa müddət sonra silinən fotolar göndərə biləcəklər.
Yeni tətbiqin əsas xüsusiyyəti sadəlik və spontanlıq üzərində qurulub. İstifadəçilər yalnız tətbiqin kamerası vasitəsilə ani şəkil çəkə bilir, qalereyadan foto yükləmək mümkün deyil. Eyni zamanda şəkillərin redaktəsi və filtr tətbiqi də deaktiv edilib – yalnız qısa mətn əlavə etməyə icazə verilir. Göndərilən foto yalnız bir dəfə açılır və maksimum 24 saat ərzində əlçatan qalır.
Sosial şəbəkələrdə yeni tendensiya
“Instants” konsepsiyası bazarda artıq mövcud olan bəzi formatları xatırladır. Tətbiq funksional baxımdan həm “BeReal”, həm də “Snapchat” platformalarının elementlərini birləşdirir. Məqsəd istifadəçilərə daha real və filtrsiz ünsiyyət imkanı yaratmaqdır.
Hazırda tətbiq İspaniya və İtaliyada məhdud istifadəçi auditoriyası üçün sınaqdan keçirilir. Digər ölkələrdə istifadəyə verilib-verilməyəcəyi ilə bağlı isə rəsmi açıqlama yoxdur.
Bununla yanaşı, Meta bu funksiyanın bir hissəsini əsas Instagram tətbiqinə inteqrasiya etməyi də nəzərdən keçirir. İstifadəçilər şəkillərini yalnız qarşılıqlı izləyicilər və ya “Yaxın dostlar” siyahısında olan şəxslərlə paylaşa biləcəklər.
Ekspertlərin fikrincə, Meta bu addımla sosial şəbəkələrdə daha səmimi və şəxsi ünsiyyət mühitini gücləndirməyə çalışır. Xüsusilə gənc auditoriya arasında populyar olan ani və filtrsiz paylaşım formatı şirkət üçün yeni imkanlar yaradır.
