Məktəbəqədər və Ümumi Təhsil üzrə Dövlət Agentliyi ilə Təhsil İnstitutu tərəfindən ümumtəhsil məktəblərində növbəti monitorinq mərhələsi keçiriləcək. Qiymətləndirmə prosesi iyunun 5-də IV siniflər, iyunun 6-da isə VI siniflər üçün təşkil olunacaq.
Bu il keçiriləcək monitorinq ölkənin bütün dövlət ümumi təhsil müəssisələrini əhatə edəcək. Ümumilikdə 300 mindən artıq IV və VI sinif şagirdinin bilik və bacarıqlarının qiymətləndirilməsi nəzərdə tutulur. Eyni zamanda 13 552 şagird kompüter əsaslı monitorinq formatında iştirak edəcək.
Monitorinqdə ilk dəfə açıq tipli suallar olacaq
Qiymətləndirmə prosesində builki əsas yenilik tapşırıqlara açıq tipli sualların əlavə edilməsidir. Bu yanaşmanın şagirdlərin məntiqi düşünmə, analiz və yazılı cavab vermə bacarıqlarının daha dəqiq ölçülməsinə xidmət etdiyi bildirilir.
IV siniflər üçün monitorinq tədris dili və riyaziyyat fənləri üzrə aparılacaq. VI sinif şagirdləri isə tədris dili, riyaziyyat və təbiət fənləri üzrə sualları cavablandıracaqlar.
Tədris dili üzrə həm qapalı, həm də açıq yazılı tapşırıqlar təqdim ediləcək. Riyaziyyat fənnində isə qapalı suallarla yanaşı, həlli tələb olunan və kodlaşdırılan açıq tipli tapşırıqlar da yer alacaq. VI siniflər üçün təbiət fənni üzrə ayrıca qiymətləndirmə bölməsi nəzərdə tutulub.
Nəticələr qiymətlərə təsir etməyəcək
Şagirdlərə verilən vaxt da siniflər üzrə fərqlənəcək. IV siniflər tapşırıqları yerinə yetirmək üçün 150 dəqiqə, VI siniflər isə 180 dəqiqə vaxt əldə edəcəklər.
Qurumun açıqlamasına görə, monitorinqin əsas məqsədi təhsilalanların mövcud bilik və bacarıq səviyyəsini müəyyənləşdirmək, tədris prosesinin effektivliyini qiymətləndirmək və gələcək inkişaf istiqamətlərini müəyyən etməkdir.
Vurğulanıb ki, monitorinq nəticələri şagirdlərin summativ qiymətlərinə, illik göstəricilərinə və ya növbəti sinfə keçidinə heç bir təsir göstərməyəcək. Əldə olunan məlumatlar yalnız təhsilin keyfiyyətinin təhlili və inkişaf planlarının hazırlanması üçün istifadə olunacaq.
