Payız mövsümündə immunitetin gücləndirilməsi xüsusilə önəmlidir. Havanın dəyişməsi, günəş işığının azalması və artan stress bədəni xəstəliklərə daha həssas edir. Gündüzlər hələ isti olsa da, gecələr havanın soyuması ilə mövsümi soyuqdəymə halları artır.
Ən vacib vitaminlər və mikroelementlər
Həkimlərin tövsiyəsinə görə, payızda immuniteti gücləndirmək üçün bu vitamin və minerallara xüsusi diqqət yetirmək lazımdır:
- Vitamin C – immunitetin əsas dayağı, soyuqdəymə əlamətlərini yüngülləşdirir və infeksiyalara qarşı müqaviməti artırır. Güclü antioksidantdır, ürək-damar xəstəlikləri və erkən qocalmanın qarşısını alır.
- Sink – virus və bakteriyalara qarşı qoruyur, soyuqdəymə simptomlarının müddətini azaldır. Onun çatışmazlığı iltihaba və immun hüceyrələrin zəifləməsinə səbəb olur.
- Vitamin D – payız və qışda çatışmazlıq daha çox müşahidə olunur. Onun əskikliyi astma, şəkərli diabet 2 tip, revmatoid artrit və digər xroniki xəstəliklərin riskini artırır.
- Vitamin A – D vitamini ilə birlikdə immun hüceyrələrin fəaliyyətini gücləndirir, hüceyrə böyüməsini və bərpasını tənzimləyir.
- Vitamin B6 və B12 – limfositlərin formalaşmasına, anticisimlərin istehsalına və hüceyrə bölünməsinə dəstək olur. Çatışmazlıq immun reaksiyaları zəiflədir.
- Fol turşusu, E vitamini, beta-karotin, dəmir və selen də immunitetin sabit saxlanmasında mühüm rol oynayır.
İmmuniteti gücləndirməyin əlavə yolları
- Aktiv qalın. Həftədə ən azı bir neçə dəfə idmanla məşğul olmaq orqanizmi möhkəmləndirir. Hətta sadə gəzinti və ya rəqs belə sağlamlığa müsbət təsir göstərir.
- Dincəlin və yaxşı yatın. Yuxu çatışmazlığı və həddindən artıq fiziki yüklənmə immuniteti zəiflədir. Normal yuxu isə stresi azaldaraq bədəni qoruyur.
- Sağlam qidalanın. Rəngarəng meyvə və tərəvəzlər, xüsusilə sitrus, giləmeyvə, kələm, eləcə də qara şokolad, çay və qarabaşaq kimi məhsullar bədəni iltihabdan qoruyan flavonoidlər baxımından zəngindir.
