Polşa xüsusi xidmət orqanları noyabrın 16-da Ukraynaya humanitar və hərbi yardım daşınmasında istifadə edilən dəmir yolunda törədilən partlayışların arxasında Rusiyanın dayandığını bəyan edib. Bu açıqlama Polşanın təhlükəsizlik nazirinin mətbuat katibi Yatsek Dobjinski tərəfindən verilib.
Y.Dobjinski bildirib: “Bütün göstəricilər Rusiyanın bu əməli həyata keçirdiyini ortaya qoyur. Biz artıq bu insidenti Şərqdən olan kəşfiyyat xidmətlərinin təşkil etdiyi terror aktı kimi qiymətləndirə bilərik.”
O əlavə edib ki, dəmir yolunda baş verən iki hadisənin araşdırılması hazırda məxfi saxlanmalıdır ki, bununla da araşdırmanın keyfiyyəti və səmərəliliyi təmin olunsun.
Xatırladaq ki, Polşanın Baş naziri Donald Tusk Varşava-Lüblin dəmiryolu marşrutunda baş verən partlayışları təxribat kimi qiymətləndirib.
