Azərbaycanın daşınmaz əmlak bazarında son illərdə diqqət çəkən əsas dəyişikliklərdən biri paytaxt Bakı ilə regionlar arasında qiymət fərqinin sürətlə azalmasıdır. Əgər təxminən 8-10 il əvvəl paytaxtda kiçik mənzilə ödənilən məbləğə bölgələrdə geniş həyətli evlər almaq mümkün idisə, indi bu fərq minimum həddə enib.
Ənənəvi olaraq Bakı ölkənin əsas iqtisadi və sosial mərkəzi sayıldığından burada qiymətlərin yüksək olması təəccüblü deyil. Dövlət qurumları, universitetlər, iş imkanları və infrastrukturun əsas hissəsi məhz paytaxtda cəmlənib. Lakin son dövrlərdə regionlarda qiymətlərin sürətlə artması yeni tendensiyanın formalaşdığını göstərir.
Qiymət artımının səbəbləri nədir?
Əmlak bazarı üzrə ekspert Mürşüd Babayev bildirir ki, müşahidə olunan dəyişiklik əslində Bakıda ucuzlaşma ilə deyil, regionlarda bahalaşma ilə bağlıdır:
“Paytaxtda qiymətlər artıq sabitləşmə mərhələsinə daxil olub. Amma bölgələrdə ciddi artım var. Bunun əsas səbəbi həyat tərzinin dəyişməsi və insanların seçimlərinin fərqlənməsidir”.
Ekspert qeyd edir ki, son illərdə regionlara köçmək istəyənlərin sayı artıb. Uzaqdan işləyənlər, şəxsi biznesini məsafədən idarə edənlər və daha sakit həyat tərzinə üstünlük verənlər paytaxtdan kənara yönəlir. Bu isə tələbatı artıraraq qiymətlərin yüksəlməsinə səbəb olur.
Digər mühüm faktor isə regionlarda yeni tikililərin sayının artmasıdır. Müasir standartlara cavab verən fərdi evlər və yaşayış kompleksləri xüsusilə gənc ailələr üçün daha cəlbedici hesab olunur. Həyət, qaraj və əlavə rahatlıqlar bu seçimdə mühüm rol oynayır.
Bununla yanaşı, Sumqayıt və Xırdalan kimi ərazilər artıq faktiki olaraq Bakı ilə inteqrasiya olunmuş zonalar kimi qiymətləndirilir. Nəqliyyat imkanlarının genişlənməsi nəticəsində bu şəhərlərdə qiymətlər paytaxta yaxınlaşıb və fərq bəzi hallarda cəmi 10-20 faiz təşkil edir.
