Azərbaycanda sosial media platformalarının tənzimlənməsi ilə bağlı yeni müzakirələr gündəmə gəlib.
Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin rəisi Əbülfət Rzayev bildirib ki, sosial şəbəkələrin hüquqi nəzarət altında olmaması onların müxtəlif cinayətlərin həyata keçirilməsi üçün alətə çevrilməsinə şərait yaradır.
Rzayev bu fikirləri Azərbaycan Hakimlərinin II Forumunda, “Cinayət mühakimə icraatının aktual məsələləri və müasir çağırışlar” mövzusunda keçirilən panel müzakirəsində səsləndirib.
“Sosial şəbəkələr nəzarətsiz qaldıqca risklər artır”
İdarə rəisi vurğulayıb ki, hazırda sosial platformalar həm informasiya yayımı, həm də cəmiyyətə təsir baxımından geniş imkanlara malikdir. Lakin hüquqi tənzimləmə mexanizmlərinin yetərsizliyi həmin şəbəkələrin sui-istifadə olunmasına yol açır.
Onun sözlərinə görə, bir çox ölkələr sosial media şirkətlərinin fəaliyyətinə daha sərt qaydalar tətbiq edib və bu addımlar ailə dəyərlərinin, şəxsi toxunulmazlığın, eləcə də ictimai təhlükəsizliyin qorunmasına xidmət edir.
“Fikir və ifadə azadlığı ilə bağlı arqumentlər önə çəkilsə də, bu sahədə lazımi hüquqi çərçivə hələ də formalaşdırılmayıb. Nəzarətdən kənarda qalan platformalar həm sosial davranışlara təsir edir, həm də cinayətkar qrupların işini asanlaşdırır. Buna görə də ölkəmizdə sosial şəbəkələrin tənzimlənməsi üçün yeni hüquqi baza yaradılmalıdır. Mövcud qanunvericilik bu mübarizəni tam şəkildə təmin etmir”, – deyə Əbülfət Rzayev qeyd edib.
O, əlavə edib ki, sosial mediada yayılan fırıldaqçılıq, kibercinayətkarlıq, narkotik vasitələrin təbliği və digər qanunsuz fəaliyyətlərə qarşı mübarizə aparmaq üçün daha müasir və çevik hüquqi mexanizmlərə ehtiyac var.
