Azərbaycan Dövlət Su Ehtiyatları Agentliyinin sədr müavini İlham Bayramov bildirib ki, su-kanalizasiya sisteminin yenilənməsi məqsədilə Bakı və Abşeron yarımadasında xüsusi dövlət proqramı hazırlanır. Proqramın hazırlanması İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA) ilə tərəfdaşlıq çərçivəsində həyata keçirilir və hal-hazırda proqram üzərində müzakirələr davam edir.
İlham Bayramovun sözlərinə görə, proqram çərçivəsində müxtəlif layihələrin həyata keçirilməsi üçün beynəlxalq donorlarla danışıqlar aparılır və maliyyə dəstəyi, həmçinin peşəkar beynəlxalq mütəxəssislərin cəlb olunması planlaşdırılır. Layihələr çərçivəsində tullantı sularının idarə olunmasının təkmilləşdirilməsi, infrastrukturun yenilənməsi istiqamətində 10 iri layihə həyata keçirilir. Bu layihələrə iri həcmli daşıyıcı kollektorların tikintisi və 3 yeni su təmizləyici qurğu komplekslərinin yaradılması daxildir.
