Smartfonun arxa qapağının və ya ekranının yüngül şəkildə qalxdığını görmüsünüzsə, bunu xırda texniki nasazlıq kimi qiymətləndirməyə tələsməyin.
Batareyanın şişməsi ciddi riskdir və bəzi hallarda alovlanma ilə nəticələnə bilər. Mütəxəssislər bildirirlər ki, belə vəziyyətdə sürətli və düzgün addım atmaq vacibdir.
Litium-ion batareyalarda şişmə adətən daxildə qazların toplanması nəticəsində baş verir. Bu isə bir neçə səbəbdən qaynaqlana bilər: həddindən artıq qızma, uzunmüddətli istifadə nəticəsində təbii aşınma, keyfiyyətsiz və ya uyğun olmayan şarj cihazından istifadə, eləcə də mexaniki zədələr.
Bəzən ilk əlamət kimi ekranın və ya arxa qapağın içəridən təzyiq nəticəsində bir qədər aralanması müşahidə olunur.
Şişmiş batareya niyə təhlükəlidir?
Ən vacib məqam odur ki, şişmiş batareya potensial yanğın mənbəyidir. Belə smartfondan istifadəni davam etdirmək və ya onu şarja qoşmaq ciddi təhlükə yarada bilər. Korpusda deformasiyanı görən kimi cihazı söndürmək və yenidən işə salmamaq tövsiyə olunur.
Mütəxəssislər istifadəçilərə telefonu özbaşına açmağı və ya batareyanı deşməklə “boşaltmağa” çalışmağı qəti şəkildə məsləhət görmürlər. Zədələnmiş litium-ion batareya hətta cüzi təmas zamanı da alovlana bilər.
Ən doğru addım rəsmi servis mərkəzinə və ya peşəkar ustaya müraciət etməkdir. Onlar batareyanı təhlükəsiz şəkildə dəyişdirə və köhnə elementi düzgün utilizasiya edə bilərlər.
Servis tapana qədər cihazı yanmayan səth üzərində saxlamaq məqsədəuyğundur. Məsələn, metal qabın içində və ya keramik plitə üzərində yerləşdirmək daha təhlükəsiz sayılır. Eyni zamanda, telefonu tez alışan əşyalardan uzaq tutmaq lazımdır.
Batareyanın şişdiyini necə müəyyən etmək olar?
Ən açıq əlamət korpusun formasının dəyişməsidir. Ekran çərçivədən bir qədər aralana, arxa qapaq qalxa və ya telefon ümumilikdə “şişmiş” görünə bilər. Bəzi hallarda cihaz masanın üzərində bərabər dayanmır və yırğalanır, çünki korpus artıq düz səth təşkil etmir.
Bundan başqa, aşağıdakı əlamətlər də diqqətə alınmalıdır:
- Düymələr əvvəlki kimi rahat basılmır və ya ilişir;
- Displey qismən yerindən ayrılıb;
- Korpusa basarkən xışıltı və ya cırıltı səsi gəlir;
- Telefon əvvəlkindən daha qalın görünür;
- Batareya sürətlə boşalır və ya cihaz qeyri-adi dərəcədə qızır.
Bəzən arxa panelə yüngül toxunduqda elastiklik hiss oluna bilər. Lakin güclü təzyiq göstərmək olmaz, çünki zədələnmiş batareya təhlükə yarada bilər.
Gələcəkdə riskləri necə azaltmaq olar?
Belə problemlərin qarşısını almaq üçün bir neçə sadə qaydaya əməl etmək kifayətdir. İlk növbədə, orijinal və ya sertifikatlı şarj cihazlarından istifadə etmək vacibdir. Keyfiyyətsiz adapterlər və kabellər batareyanın həddindən artıq qızmasına səbəb ola bilər.
Telefonu yüksək temperatur şəraitində saxlamaqdan çəkinmək lazımdır. Məsələn, cihazı günəş altında və ya avtomobilin salonunda qoymaq batareyaya mənfi təsir göstərə bilər. Həmçinin smartfonu daim elektrik şəbəkəsinə qoşulu vəziyyətdə saxlamaq tövsiyə edilmir.
Vaxt keçdikcə hər bir batareya öz tutumunu itirir. Əgər cihazın işləmə müddəti əhəmiyyətli dərəcədə azalıbsa, şişmə baş verməzdən əvvəl batareyanın dəyişdirilməsi barədə düşünmək daha təhlükəsizdir.
Unutmayın: şişmiş batareya xırda nasazlıq deyil. Vaxtında müdaxilə həm cihazınızı, həm də təhlükəsizliyinizi qorumağa kömək edəcək.
