Tesla-nın büdcə seqmenti üçün hazırladığı yeni elektromobil layihəsi növbəti mərhələyə keçib. Şirkət daxilində ortaya çıxan texniki kodlar göstərir ki, şərti olaraq Model 2 adlandırılan model artıq konkret platforma və batareya konfiqurasiyası üzərində formalaşır.
Daxili identifikator kimi göstərilən PACK_53_LFP_NV9X kodu 53 kVt·saat tutumlu litium-dəmir-fosfat (LFP) tipli batareyaya işarə edir. Bu göstərici təxminən 25 000 avro qiymət seqmentində nəzərdə tutulan modelə uyğun hesab olunur.
LFP batareyalar daha aşağı maya dəyəri və uzunömürlülüyü ilə seçildiyindən, Tesla-nın kütləvi bazara yönəlmiş strategiyasına uyğun gəlir.
Yeni platforma və yüksək səmərəlilik hədəfi
NV9X kodunun mövcud Tesla platformaları ilə üst-üstə düşməməsi tamamilə yeni arxitekturanın hazırlandığını göstərir. Mənbələrə görə, bu platformada əsas diqqət çəkisi azaltmağa, kabel sistemini sadələşdirməyə və istehsal prosesində avtomatlaşdırmanı maksimum səviyyəyə çatdırmağa yönəlib.
Şirkətin əsas məqsədlərindən biri enerji sərfiyyatını 100 km üçün 8,1 kVt·saatdan aşağı saxlamaqdır. Bu göstərici reallaşarsa, Model 2 hazırkı seriya elektromobillərin əksəriyyətindən daha qənaətcil olacaq.
53 kVt·saatlıq batareya ilə avtomobilin təxminən 350–400 km yürüş ehtiyatı təqdim edəcəyi gözlənilir ki, bu da şəhər və gündəlik istifadə üçün kifayət qədər rəqabətqabiliyyətli göstəricidir.
Tesla-nın yanaşması yüksək gücdən çox, konstruksiyanın sadəliyinə və effektivliyinə əsaslanır. Modelin ən tez 2027-ci ildə təqdim ediləcəyi ehtimal olunur. Hazırda şirkət aşağı qiymət, innovativ istehsal və enerji səmərəliliyi balansını qoruyan kütləvi model üzərində işləyir.
