Qısa videoların fasiləsiz axınından yorulan istifadəçilər üçün YouTube yeni həll təqdim edib. Mobil tətbiqdə istifadəyə verilən funksiya sayəsində artıq Shorts bölməsini demək olar ki, tam deaktiv etmək mümkündür.
Yenilik “vaxtın idarə olunması” alətləri çərçivəsində təqdim olunub. Əslində bu funksiya əvvəllər valideyn nəzarəti üçün nəzərdə tutulmuşdu, lakin indi bütün istifadəçilər üçün əlçatan edilib. Əsas fərq isə ondadır ki, artıq gündəlik baxış limiti sıfır dəqiqəyə qədər endirilə bilir.
Shorts-u necə məhdudlaşdırmaq olar
Yeni funksiyanın aktivləşdirilməsi üçün istifadəçilər mobil tətbiqdə bir neçə sadə addım atmalıdır:
- tətbiqi açmaq və profil ikonuna daxil olmaq
- “Ayarlar” bölməsinə keçmək
- “Vaxtın idarə olunması” menyusunu seçmək
- “Gündəlik limit” bölməsinə daxil olmaq
- siyahının aşağı hissəsində Shorts üçün məhdudiyyəti aktivləşdirmək
- limiti “0 dəqiqə” olaraq təyin etmək
Bu parametrlər tətbiq edildikdən sonra Shorts lentində avtomatik videoların fasiləsiz keçidi dayandırılır. İstifadəçi növbəti videoya keçmək istədikdə sistem limitin dolduğunu bildirir.
Bununla belə, Shorts bölməsini tamamilə yox etmək mümkün deyil. Qısa videolar abunə lentində qalmağa davam edir və istənildikdə əl ilə açmaq mümkündür. Lakin əsas üstünlük ondadır ki, istifadəçiləri saatlarla vaxt aparan avtomatik “scroll” prosesi aradan qalxır.
Qeyd edək ki, platforma son dövrlərdə funksiyalarını aktiv şəkildə yeniləyir. Məsələn, yaxın zamanda videolar üçün süni intellekt əsaslı dublyaj funksiyası əlavə edilib və istifadəçilər artıq səs yolunu dəyişə bilirlər.
Ümumilikdə, yeni limit funksiyası sosial şəbəkələrdə vaxt nəzarətini artırmaq və istifadəçilərin diqqətini daha səmərəli idarə etmək məqsədi daşıyır.
