Milli Məclisin deputatı, filologiya elmləri doktoru Elnarə Akimova Prezident İlham Əliyevin 2026-cı ili “Şəhərsalma və Memarlıq İli” elan etməsini strateji qərar kimi qiymətləndirib. Bu Sərəncam memarlar, urbanistlər və gənc mütəxəssislər üçün böyük imkanlar açacaq.
Deputat qeyd edib ki, sənəd müasir dövlətçiliyin inkişaf fəlsəfəsini əks etdirir və urbanistik düşüncəni, milli memarlıq irsini dövlət siyasətinin prioritetinə çevirir. Bakıdan regionlara, azad edilmiş ərazilərə qədər həyata keçirilən layihələr şəhərsalmanın sadə infrastruktur məsələsindən çıxıb sosial rifahın və estetik kimliyin ifadəçisinə çevrildiyini göstərir.
Tarixi irs və müasir sintez
Azərbaycanın İçərişəhərdən Şəkiyə, Gəncədən Naxçıvana qədər formalaşmış memarlıq məktəbləri xalqın estetik zövqünü özündə saxlayır. Bu irsi ekoloji tələblər və yeni texnologiyalarla birləşdirmək dövlət siyasətinin əsas istiqamətidir. Qarabağ və Şərqi Zəngəzurda “ağıllı şəhər” və “ağıllı kənd” layihələri memarlığı insan mərkəzli, təhlükəsiz mühit yaratmağa çevirib. Burada 12 şəhərin Baş planı hazırlanmış, 100-dən çox yaşayış məntəqəsi planlaşdırılıb.
2026-cı ildə elmi forumlar, beynəlxalq sərgilər, müsabiqələr və maarifləndirmə layihələri keçiriləcək. Bu peşəkar mühiti gücləndirəcək, dünya təcrübəsini milli memarlıqla sintez edəcək. Şəhər mədəniyyəti cəmiyyətin məsuliyyəti ilə formalaşacaq – tarixi abidələrin qorunmasından ictimai məkanların düzgün istifadəsinə qədər.
Prezidentin Sərəncamı iqtisadi-sosial tərəqqidən estetik zövqə, mədəni yaddaşa qədər geniş spektr əhatə edir. Azərbaycan şəhərləri milli düşüncənin və müasir dövlətçiliyin simvolu kimi parlaq görünəcək.
