Azərbaycanın Cəbrayıl rayonunda reallaşan Şəfəq (Cəbrayıl) Günəş Elektrik Stansiyası layihəsinin tikinti işləri planlaşdırıldığı kimi davam edir. Bu barədə BP, SOCAR Green və Azərbaycan Biznesinin İnkişafı Fondunun (ABİF) birgə dəstəyi ilə həyata keçirilən layihə çərçivəsində məlumat verilib.
2025-ci ilin iyununda yekun investisiya qərarının qəbulundan sonra, təxminən 117 milyon ABŞ dolları dəyərində olan Mühəndislik, Təchizat və Tikinti (EPC) müqaviləsi “Intec” və “Complant” şirkətlərinə verilib. Müqaviləyə obyektin tam tikintisi və ilk iki il ərzində istismar, texniki xidmət işləri daxildir. Hazırda torpaq işləri və daxili yolların çəkilişi ilə tikinti prosesi davam edir.
Modul təchizatı üçün 29 milyon ABŞ dolları dəyərində müqavilə Trina Solar (Schweiz) AG şirkəti ilə bağlanıb. Avqust ayında ilk günəş panelləri sahəyə çatdırılıb və işlər sürətləndirilib.
“Shafag (Jabrayil) Solar Limited”in direktoru Kolin Allan bildirib ki, SOCAR Green və ABİF ilə əməkdaşlıqda həyata keçirilən layihə uğurla irəliləyir.
Tikinti sahəsində aparılan torpaq işləri zamanı arxeoloji zənginliklər də aşkar edilib. Şimal hissəsində Tunc və Erkən Dəmir dövrlərinə aid yaşayış məskəninin qalıqları və digər nadir artefaktlar tapılıb. Azərbaycan Arxeologiya və Antropologiya İnstitutunun mütəxəssisləri ilə birgə araşdırmalar aparılır.
Layihənin tikintisi 2027-ci ilin ortalarına kimi davam edəcək və bu müddətdə yerli resurslardan maksimum dərəcədə istifadə olunacaq. Tikintinin pik dövründə 400-ə yaxın yeni iş yeri yaradılması gözlənilir.
Qeyd edək ki, Şəfəq Günəş Layihəsi çərçivəsində 240 MVt gücündə stansiya tikilir və bu, Səngəçal terminalının elektrikləşdirilməsi layihəsi ilə birgə virtual enerji ötürmə mexanizmi vasitəsilə ölkə enerji sisteminə inteqrasiya ediləcək. Layihənin həyata keçirilməsi ilə terminalda əmələ gələn emissiyaların təxminən 50%-nin azaldılması nəzərdə tutulur.
BP şirkəti Lightsource BP vasitəsilə Şəfəq layihəsində 50,01%, SOCAR Green 39,99%, ABİF isə 10% paya malikdir.
